Tækniskólinn og Samtök iðnaðarins hafa, í samstarfi við alla iðn- og verkmenntaskóla á landinu, hrundið af stað herferð sem ber nafnið #kvennastarf. 

Algengt er að talað sé um „hefðbundin kvennastörf“  Með #kvennastarf er ætlunin að brjóta niður úreltar hugmyndir og benda ungu kynslóðinni á að fyrir bæði kynin eru allar leiðir færar í námi og starfi.

Tilgangurinn er m.a. að vekja athygli á fjölbreyttum störfum í iðn-, tækni- og verkgreinum og benda á þann kynjamun sem hefur viðgengist í sumum starfsstéttum. Í nútímasamfélaginu á Íslandi telja margir að jafnrétti kynjanna ríki á flestum sviðum. En er raunin sú?

Myndir – myndbönd – heimasíða

Herferðin hófst á birtingu ljósmynda, sem prýða nú mörg strætisvagnaskýli á höfuðborgarsvæðinu. Myndirnar sýna stelpur sem eru nemendur í viðkomandi iðngrein og er ætlað að varpa ljósi á glæsilegar fyrirmyndir sem stunda nám eða vinna við þessi störf.

Gefin verða út myndbönd um nám og störf kvenna í nokkrum faggreinum. Myndböndin segja sögu kvenkyns frumkvöðla í karllægum iðngreinum og sögur kvenna sem eru nemendur í dag eða vinna við greinina.

Vefurinn kvennastarf.is er kominn í loftið og þar má finna gagnlegar upplýsingar um málefnið og skemmtilega nálgun í gegnum samfélagsmiðla. Á vefsíðunni er t.d. að finna ótrúlegar tölfræðiupplýsingar sem sýna óútskýranlegan kynjahalla í nokkrum starfsgreinum.  

Allir, bæði fólk í verk- og iðngreinum og í öðrum starfsstéttum, eru hvattir til að taka þátt og virkja hashtaggið #kvennastarf með því að setja myndir úr námi og starfi eða öðru sem tengist málefninu, inn á samfélagsmiðla á borð við Twitter, Instagram og Facebook. Ekkert starf er ekki kvennastarf. Konur geta starfað við það sem þeim sýnist og það sama gildir um karlmenn

Tilgangur og markmið

Átakinu #kvennastarf er ætlað að vera stelpum og ungu fólki hvatning til að skoða alla möguleika í vali á námi og framtíðarstarfi og horfa opnum augum á hvar áhugasvið þeirra liggur. Allir eiga að geta starfað við það sem þá langar til.

Iðn- og verkmenntaskólar stefna á fjölgun fagmenntaðs fólks og markmið þeirra er að 20% grunnskólanema velji iðn-, tækni- og verkmenntun árið 2025 og að lágmarki 30% árið 2030.

Með #kvennastarf er ætlunin að sýna fram á að kynjahallinn sem er í iðn- og verkgreinum er óþarfur. Ef ungt fólk af báðum kynjum sér tækifæri í starfsmenntun, verður auðveldara að fjölga nemendum í þessum greinum og fleira fagmenntað fólk verður til í íslensku atvinnulífi.

 

Fagráð herferðar:

Sá breiði hópur skóla og samtaka sem stendur að baki #kvennastarf hefur skipað sérstakt fagráð sem í sitja: 

• Jón B. Stefánsson – skólameistari Tækniskólans
• Ársæll Guðmundsson – skólameistari Borgarholtsskóla, BHS
• Guðrún Hrefna Guðmundsdóttir – skólameistari Fjölbrautaskóla Breiðholts, FB                       

 

Talsmenn #kvennastarf:

Ólafur Sveinn Jóhannesson – s: 665 1155
Ágústa Sveinsdóttir – s: 699 2264

Árshátíð NMÍ var haldið í Edinborgarhúsinu laugardaginn 11. febrúar. Glæsileg þrírétta máltíð var borin fram og veislustjóri var Lalli töframaður sem sá um að kitla hláturtaugar viðstaddra svo um munaði. Góð mæting var á árshátíðina og nemendur mættu í sínu fínasta pússi eins og sjá má á meðfylgjandi myndum. Að veislunni lokinni tók svo við dansleikur fram á nótt.

Á fimmtudaginn mætir MORFÍS lið MÍ Laugvetningum í átta liða úrslitum MORFÍS. MÍ keppir heima að þessu sinni og keppnin fer fram í Gryfjunni og hefst kl. 20. Keppendur MÍ hafa staðið í ströngu undanfarna daga við undirbúning og ræðuskrif. Við hvetjum nemendur, starfsfólk skólans og bæjarbúa til að mæta á keppnina og hvetja MÍ-inga áfram.

MÍ lauk keppni í Gettu betur í gær þegar firnasterkt lið FG lagði lið MÍ en lokatölur voru 21-35 fyrir FG. Okkar krakkar lögðu á sig mikla vinnu við æfingar og stóðu sig vel í keppninni þetta árið þrátt fyrir tapið í gær. Það gengur bara betur á næsta ári.

Í kvöld mætir Gettu betur lið MÍ þau Ína Guðrún, Kolbeinn og Veturliði, Fjölbrautarskólanum í Garðabæ í annarri umferð Gettu betur 2017. Viðureigninni verður útvarpað á Rás2 og hefst hún klukkan 20. Það lið sem ber sigur úr býtum mun komast áfram í 8 liða úrslit í sjónvarpi í lok mánaðarins. Við óskum Ínu Guðrúnu, Kolbeini og Veturliða góðs gengis í kvöld. Áfram MÍ!

Dregið hefur verið í 16 liða úrslitum í Gettu betur. Lið MÍ mun mæta liði Fjölbrautaskólans í Garðabæ og fer viðureignin fram á rás2 þriðjudaginn 7. febrúar.Lið FG komst áfram í aðra umferð sem eitt þriggja stigahæstu tapliðanna. Áfram MÍ!

MÍ er komið áfram í 2. umferð í Gettu betur. Liðið lagði fyrr í kvöld lið Verkmenntaskóla Austurlands, 24-18. Til hamingju með flottan árangur Ína Guðrún, Kolbeinn Sæmundur, Veturliði Snær og Ingunn Rós þjálfari.

Vísindadagar voru haldnir í MÍ í lok nóvember á síðasta ári. Emil Ingi Emilsson kennari tók fjöldann allan af myndum á meðan á Vísindadögum stóð og hluti af þeim hefur nú verið birtur hér á síðunni. Myndirnar má skoða með því að smella hér.

Keppni í Gettu betur hefst á Rás 2 mánudaginn 30. janúar. Fyrsta viðureignin þetta árið er viðureign MÍ og VA. Lið MÍ skipa þau Ína Guðrún Gísladóttir, Kolbeinn Sæmundur Hrólfsson og Vetuliði Snær Gylfason. Í fyrra komst lið MÍ sem kunnugt er í fyrsta sinn áfram í 3. umferð og þar með í sjónvarpskeppnina. Liðið í ár stefnir að sjálfsögðu að sama marki og er þeim óskað góðs gengis í keppninni á mánudaginn.

Eins og aðrir hér um slóðir fögnuðum við í MÍ sólarkomunni í dag. Nemendur og starfsmenn komu saman á sal, glöddust og gæddu sér á sólarkaffi í umsjón nemenda á þriðja ári.