Menntaskólinn á Ísafirði óskar nemendum, starfsmönnum og landsmönnum öllum gleðilegs árs, með þökk fyrir samstarfið á árinu 2016.

Skólastarf á vorönn hefst þann 5. janúar kl. 9 með samverustund á sal. Töflubreytingar hefjast hjá áfangastjóra og námsráðgjafa kl. 10 og standa til kl. 14 en nemendur sækja sér fyrst númer hjá ritara. Kennsla hefst svo samkvæmt stundaskrá föstudaginn 6. janúar kl. 8.10. Opnað verður fyrir stundatöflur nemenda í INNU þann 4. janúar. Heimavistin verður opin frá 4. janúar og nýir heimavistarbúar þurfa að hitta fjármálastjóra 5. janúar og skrifa undir samning. Mötuneyti skólans verður opið frá 5. janúar.

Með ósk um gott gengi á vorönn 2017!

Menntaskólinn á Ísafirði óskar nemendum og starfsfólki gleðilegra jóla og farsæls nýjárs og þakkar samstarfið á árinu sem er að líða. Skrifstofa skólans verður lokuð það sem eftir lifir af árinu. Opnað verður aftur þriðjudaginn 3. janúar 2017 kl. 9. 

Starf með nemendum á vorönn hefst þann 5. janúar kl. 9, með stutri athöfn á sal. Töflubreytingar fara fram milli kl. 10 og 14 sama dag. Kennsla hefst samkvæmt stundaskrá kl. 8.10 þann 6. janúar.

Skrifstofa Menntaskólans á Ísafirði er nú lokuð. Opnar skrifstofan aftur þriðjudaginn 3. janúar 2017 kl. 9.

Föstudaginn 16. desember s.l. voru 13 nemendur brautskráðir frá skólanum við hátíðlega athöfn í Ísafjarðarkirkju. Alls luku fjórir nemendur stúdentsprófi, þrír af félagsfræðabraut og einn af viðskipta-og hagfræðibraut. Þá voru í fyrsta sinn útskrifaðir skipstjórar með B-réttindi (að 45 metrum). Alls luku 9 skipstjórar prófi með B-réttindi. Við athöfnina fluttu þau Madis Mäekalle, Matilda Mäekalle og Orri Daniel Llorens tónlist og verðlaun voru veitt fyrir góðan námsárangur.

Útskriftarathöfn haustannar verður haldin í dag, 16. desember kl. 17 í Ísafjarðarkirkju. Að þessu sinni verða brautskráðir 13 nemendur frá skólanum, 9 skipstjórar með B réttindi og 4 stúdentar. Allir velunnarar skólans eru velkomnir á athöfnina. 

Við MÍ fer fram innra mat á skólastarfinu eins og kveðið er á um í Aðalnámskrá  frá 2011 og reglugerð nr. 700 frá 2010 um mat og eftirlit í framhaldsskólum. Í 3. grein reglugerðarinnar segir m.a.:  

Hver framhaldsskóli skal með kerfisbundnum hætti meta árangur og gæði skólastarfsins. Virkt innra mat skal samofið annarri starfsemi skóla og skal skapa forsendur fyrir markvissu mati á árangri og leiðum að markmiðum skóla. Innra mat skal vera umbótamiðað og ná til allra helstu þátta skólastarfsins. Það skal stuðla að aukinni vitund um mikilvægi gæða í öllu starfi.

Tryggja skal virka þátttöku starfsmanna, foreldra, nemenda og skólaráðs í innra mati, eftir því sem við á. Innra mat skal byggja á fjölbreyttum gögnum sem taka mið af viðfangsefnum hverju sinni.

Framhaldsskólar skulu birta opinberlega og á aðgengilegan hátt, á heimasíðu sinni eða með öðrum hætti, upplýsingar um framkvæmd innra mats, helstu niðurstöður og umbótaáætlun. Einnig skal gera grein fyrir tengslum matsins við skólanámskrá og stefnu skólans.

Sjálfsmatsnefnd skólans sem sinnir innra mati hefur nú lokið skýrslu fyrir skólaárið 2015-2016. Skýrsluna má finna hér á heimasíðunni.

Dagana 29. og 30. nóvember n.k.  verða vísindadagar í Menntaskólanum á Ísafirði. Er þetta í þriðja skiptið sem slíkir dagar fara fram. Á Vísindadögunum verður hefðbundið skólastarf brotið upp með sýningum og kynningum nemenda á því fjölbreytta starfi sem fram fer í skólanum.

Á Vísindadögunum verður ýmislegt í boði. Má þar nefna gagnvirka landafræðikynningu, efnafræðitilraunir, hægt verður að sjá þyngdarlögmálið með eigin augum, boðið verður upp á tímaflakk á tölvusýningu, FabLab verður opið þar sem hægt verður að fylgjast með nemendum gera silkiþrykk, stuttmyndir sem nemendur hafa gert sýndar og ýmiss konar kynninga og sýninga. Er þá aðeins fátt eitt upptalið af því sem nemendur skólans taka sér fyrir hendur á vísindadögum og erum við ákaflega stolt af hugmyndaauðgi þeirra og áhuga. Dagskránni lýkur með verðlaunaafhendingu á miðvikudeginum kl. 14:10. Veitt verða sérstakar viðurkenningar fyrir athyglisverðustu kynninguna og athyglisverðustu sýninguna. Dagskrá Vísindadaganna má finna hér.

 

Vísindadagar MÍ 2016 verða settir í Gryfjunni (sal MÍ) þriðjudaginn 29. nóvember kl. 8:10. Allir íbúar skólasamfélagsins nær og fjær eru velkomnir í skólann á meðan á Vísindadögum MÍ 2016 stendur.

Fimmtudaginn 24. nóvember kl. 9:10 verður haldið nemendaþing sem ber yfirskriftina Gerum góðan skóla betri. Unnið verður í litlum hópum og verða niðurstöður m.a. kynntar á Vísindadögunum í næstu viku.

Morfís lið MÍ gerði góða ferð suður í Kópavog fyrir helgina. Skólarnir mættust í kappræðum síðastliðinn föstudag og stóð líð MÍ upp sem sigurvegari að keppni lokinni. Liðið er þar með komið í 16 líða úrslit og mætir Borgarholtsskóla í næstu viðureign. Við óskum þeim Ingunni Rós, Úlfi, Veturliða, Hákoni Erni og Ívari Tuma innilega til hamingju með sigurinn og óskum þeim jafnframt góðs gengið við undirbúning og æfingar fyrir næstu keppni.

Dagur íslenskrar tungu var haldinn hátíðlegur þann 16. nóvember síðstliðinn. Á deginum, sem er fæðingardagur Jónasar Hallgrímssonar, var boðið upp á veglega dagskrá á sal, í umsjón nokkurra nemenda í í íslensku. Veg og vanda af umsjón dagskránnar hafði Emil Ingi Emilsson íslenskukennari. Flutt voru ljóð og textar sem fjölluðu á einn eða annan hátt um Vestfirði eða tengdust svæðinu. Einnig var flutt tónlist. Við þökkum þeim sem skipulögðu og tóku þátt í þessari dagskrá, kærlega fyrir skemmtunina.