Áfangalýsing:

Farið er lauslega yfir sögu forritunar, uppbyggingu tölvu og helstu stýrikerfi. Farið er í undirstöðuatriði forritunar og lausnir einfaldra forritunarverkefna í hlutbundnu forritunarmáli, t.d. Python og Pygame eða Java. Áfanginn getur hentað nemendum á öllum brautum. Helstu hugtök: Uppbygging tölvu, hugbúnaður og vélbúnaður, breytur, virkjar, fylki, heiltölur, kommutölur, gildissvið (scope), slembitölur, strengir, listar, grafík, föll, stafasett, tvíundar-, tuga- og sextándaform, búlskar segðir og skilyrðissetningar, lykkjur, inntak og úttak í textabundnum notendaskilum, athugasemdir röðun, prófun og villuleit.

Forkröfur: Að geta lesið námsefni á ensku

Markmið:

Nemandi skal hafa öðlast þekkingu og skilning á:

• sögu forritunar, hug- og vélbúnaðar.
• helstu innviðum tölvu.
• samspili vél- og hugbúnaðar.
• muninum á heiltölubreytum, rauntölubreytum, textabreytum og rökbreytum.
• skilyrðissetningum.
• endurtekningum og lykkjum.
• einfaldri forritun þar sem notaðar eru breytur, skilyrðissetningar og lykkjur.

Nemandi skal hafa öðlast leikni í að:

• framkvæma reikning talna milli mismunandi talnakerfa
• greina, hanna og forrita einfaldari forrit á sem bestan máta
• skipuleggja tög og uppbyggingu forrita með föllum
• forrita með skilyrðum, lykkjum og föllum vinna með einfalda grafík og hljóð

Nemandi skal geta hagnýtt þá almennu þekkingu og leikni sem hann hefur aflað sér til að:

• reikna milli talnakerf
• smíða forrit frá grunni skv. verklýsingu, bæði með og án grafíkur
• skipta flóknu algrími upp í nokkra einfaldari hluta (föll)
• byggja upp forritskóða á læsilegan og skipulegan hátt
• skilja forrit og forritshluta, aðgerðir, tilgang þeirra og markmið