Á morgun, fimmtudaginn 10. mars frá kl. 17:30-19:00, verður opið hús í Menntaskólanum. Markmið opna hússins er að kynna starfsemi skólans fyrir nemendum í 10. bekk á norðanverðum Vestfjörðum og forráðamönnum þeirra sem og öðrum sem hafa hug á að kynna sér starfsemi skólans.

Á opna húsinu verður sérstök áhersla lögð á að kynna verknámsframboð skólans og geta gestir skoðað verknámsaðstöðu þar sem kennarar og nemendur munu taka á móti þeim og ýmis verkefni verða í gangi. Bóknámskennarar verða í bóknámshúsi og segja frá áherslum í bóknámi og bókasafnið verður opið.  Einnig munnámsráðgjafi veita upplýsingar um nýjar námsbrautir og inntökuskilyrði í skólann. Nemendur verða á staðnum og kynna félagslífið. 

Boðið verður upp á leiðsögn um húsakynni skólans kl. 17:45 og 18:30. Gestir á opnu húsi fá tækifæri til að spreyta sig í ratleik og eru vegleg verðlaun í boði.

Starfsmenn og nemendur MÍ bjóða gesti velkomna á opið hús fimmtudaginn 10. mars.

Dagana 4. mars - 10. apríl fer fram forinnritun 10. bekkinga á síðunni menntagatt.is. Allir 10. bekkingar á Íslandi eiga að hafa fengið upplýsingar um forinntritun afhentar í sínum grunnskólum. Foreldrar og forráðamenn eiga sömuleiðis að hafa fengið sendar upplýsingar heim um innritunina. Lokainnritun 10. bekkinga fer síðan fram 4. maí - 10. júní. Allar upplýsingar um nám í boði við Menntaskólann á Ísafirði sem og inntökuskilyrði má finna hér.

Gróskudagar verða síðustu þrjá daga Sólrisuviku eins og verið hefur undanfarin ár. Að vanda verða fjölmargar áhugaverðar smiðjur í boði. Nemendur geta kynnt sér smiðjurnar með því að smella á hlekk hér fyrir neðan. Allir nemendur þurfa að skrá sig í smiðjur öll 8 tímabilin þessa daga, þ.e.a.s. 3 smiðjur á miðvikudegi, 3 á fimmtudegi og 2 á föstudegi.

Gróskusmiðjur 2016

Skráning í smiðjur hefst í dag og fer fram á netinu. Hlekkurinn á skráninguna er hér fyrir neðan. 

ATH! Skráningu í smiðjur er LOKIÐ. Ef einhverjir eiga eftir að skrá sig þurfa þeir að hafa samband við skrifstofu skólans.

ATHUGIÐ! Sumar smiðjur eru þess eðlis að þær standa yfir í fleiri en eitt tímabil. Sem dæmi má nefna Hönnunarkeppnin sem stendur yfir alla Gróskudagana og nemendur sem skrá sig í hana geta ekki skráð sig í aðrar smiðjur. Lesið því vel allar útskýringar á smiðjum og hafið þetta í huga þegar þið veljið. 

Góða skemmtun!

Sólrisuvikan er að skella á og verður sett á morgun, föstudaginn 26. febrúar. Að venju verður farið í skrúðgöngu um bæinn. Við hvetjum þá sem vilja fylgjast með atburðum á Sólrisuvikunni að líka við atburð  á Facebook, Sólrisuhátíð 2016:

Í Sólrisuvikunni setur Leikfélag MÍ á svið Litlu hryllingsbúðina eftir Alan Menken og Howard Ashman. Laust mál er í þýðingu Einars Kárasonar og söngtextar í þýðingu Megasar. Leikstjóri er Ingrid Jónsdóttir.

Frumsýning verður föstudaginn 26. febrúar kl. 20:00 í Edinborgarhúsinu og alls verða sýningarnar fimm. Hægt er að panta miða í síma 779-2644 eftir kl. 12:00 á daginn. 

Sýningar verða sem hér segir: 

Frumsýning 26. febrúar klukkan 20:00
2. sýning 28. febrúar klukkan 20:00
3. sýning, 29. febrúar klukkan 20:00
4. sýning 1. mars klukkan 20:00
5. sýning 3. mars klukkan 20:00

Verð:
12 ára og eldri : 3000 kr
6-11 ára : 2500
NMÍ: 2500
Öryrkjar og eldriborgarar: 2500

MÍ keppti við MH í Gettu betur í kvöld. MÍ leiddi keppnina með einu stigi eftir hraðaspurningar en leikar enduðu með sigri MH, 36-26. Keppendur og stuðningsliðið stóðu sig með stakri prýði og voru skólanum sínum til mikils sóma.

Í kvöld kl. 20 keppir MÍ í fyrsta sinn í sögu skólans í sjónvarpshluta Gettu betur. Mótherjarnir eru MH og fer keppnin fram í sjónvarpssal. Keppendur, liðsstjóri og þjálfari fóru suður í dag og í morgun kl. 8 lagði stuðningsliðið af stað í rútu. Við óskum Gettu betur liðinu Dórótheu Magnúsdóttur, Friðriki Þóri Hjaltasyni og Kolbeini Sæmundi Hrólfssyni og liðsstjóranum Veturliða Snæ Gylfasyni góðs gengis í kvöld. Um leið hvetjum við alla núverandi og fyrrverandi MÍ-inga til að senda liðinu góða strauma og horfa á keppnina sem hefst eins og fyrr segir á RÚV kl. 20. Áfram MÍ.

Skólaráð samþykkti á síðasta fundi sínum smávægilegar breytingar á skóladagatali vorannar. Námsmatsdögum voru færðir framar í maí og þeim fjölgað um tvo og tveir úrvinnsludagar bættust við fyrir aftan námsmatsdaga. Einnig var miðannarmatsdagur sem vera átti 17. febrúar færður til 8. mars. Nýtt skóladagatal er komið inn á heimasíðu skólans og það má einnig sjá hér.

Eins og aðrir hér um slóðir fögnuðum við í MÍ sólarkomunni. Á fimmtudaginn komu nemendur skólans á sal, fögnuðu saman og gæddu sér á sólarkaffi í umsjón 3. bekkinga. Sjá má nokkrar myndir úr sólarkaffinu á myndasíðunni.

MORFÍS-liðið okkar tapaði mjög svo naumlega fyrir liði Menntaskólans að Laugarvatni. Aðeins munaði 69 stigum á liðunum en 2500 stig eru alls í dómarapottinum. Við erum stolt af keppendunum okkar, þeim Ingunni Ósk Kristjánsdóttur, Kolbeini Sæmundi Hrólfssyni, Þórði Úlfi Júlíussyni og Rannveigu Sigríði Þorkelsdóttur liðsstjóra, sem hafa lagt mikið á sig undanfarnar vikur og mánuði í æfingum og undirbúningi.