Áfangalýsing:
Hvernig vitum við að veruleikinn er eins og hann birtist okkur? Hvað er þekking? Hvað er sannleikur? Hvað er vitund? Er guð til? Í áfanganum verða teknir fyrir valdir þættir í vestrænni heimspekisögu frá Grikklandi til forna fram að lokum 20. aldar. Lögð er áhersla á að nemendur öðlist undirstöðuþekkingu í þróun heimspeki í gegnum mannkynssöguna ásamt grundvallarskilningi á helstu heimspekikenningum sem hafa mótað viðhorf mannsins til siðferðis, frelsis, guðs og eðli heimsins í kringum hann. Áhersla er lögð á sjálfstæða hugsun og vinnubrögð, nemendur eru hvattir til að horfa með gagnrýnum augum á námsefnið jafnt sem eigin skoðanir og viðhorf. Mikil áhersla verður lögð á umræður í tímum og því er þátttaka í þeim mjög mikilvæg. Verkefnavinna miðar að því að nemendur öðlist hæfni til að nýta eigin þekkingu og reynslu við úrlausn nýrra viðfangsefna.
Forkröfur: FÉLV1IF05
Markmið:
Nemandi skal hafa öðlast þekkingu og skilning á:
- völdum heimspekingum og heimspekikenningum frá Forn-Grikklandi til okkar tíma.
- mikilvægi gagnrýninnar hugsunar.
- undirstöðuatriðum heimspekilegrar hugsunar.
- lestri heimspekitexta.
- heimspekilegum samræðum.
Nemandi skal hafa öðlast leikni í að:
- lesa heimspekitexta.
- endursegja og skýra heimspekitexta.
- beita gagnrýninni hugsun.
- meta eigin rök og annarra.
- tjá sig heimspekilega og hlusta á aðra.
- tengja heimspeki við eigin reynslu og veruleika.
Nemandi skal geta hagnýtt þá almennu þekkingu og leikni sem hann hefur aflað sér til að:
- geta miðlað torskildum fróðleik á skýran hátt.
- geta beitt gagnrýninni hugsun á markvissan hátt á öllum sviðum lífsins.
- geta borið saman ólíkar skoðanir og rök til að komast að sameiginlegri niðurstöðu.
- geta tileinkað sér nýja þekkingu á markvissari hátt.
- skilja betur heiminn og samfélagið sem hann býr í.
- beita heimspekilegum hugmyndum til að leysa úr siðgerðilegum vandamálum.
