Lýsing: Á brautinni er lögð áhersla á nám fyrir nemendur með fjölbreyttan menningar- og tungumálabakgrunn. Í náminu er leitast við að þjálfa nemendur í íslensku máli, sem og menningarfærni, og með því stuðla að félagslegri vellíðan nemandans. Markmið námsins felur í sér að nýja tungumálið sé lykill að íslensku samfélagi, íslensku skólastarfi, íslensku atvinnuumhverfi og brúi ólíka menningarheima. Með námi á brautinni er stefnt að því að nemendur verði sem best í stakk búnir til að taka virkan þátt í íslensku, lýðræðislegu þjóðfélagi. Því er lögð áhersla á að námsþættirnir snerti persónulega færni, félagslega færni og að lokum starfsfærni eftir því sem framast er unnt. Brautin veitir ekki eiginleg réttindi, en með námi á brautinni er nemendum gert kleift að auka möguleika sína til náms og starfa í íslensku samfélagi. Eitt af lokamarkmiðum námsins er að opna möguleika nemenda á frekara námi við íslenska framhaldsskóla. 

Námsframvinda: Að námi loknu geta nemendur útskrifast með 52 einingar eða innritast í annað skilgreint nám á framhaldsskólastigi. Auk íslenskuáfanga eru áfangar í náms- og starfsfræðslu, matreiðslu, upplýsingatækni og áfangar í verkgreinum með það að markmiði að nemendur kynnist öðrum greinum sem kenndar eru í skólanum. Þeir nemendur sem hafa góðan grunn í ensku og/eða stærðfræði eiga möguleika á sækja almenna áfanga í þeim greinum. Allt nám á brautinni er hugsað til undirbúnings fyrir frekara nám á framhaldsskólastigi. 

Inntökuskilyrði á brautina: Námsbrautin er opin öllum nemendum með fjölbreyttan menningar- og tungumálabakgrunn sem náð hafa framhaldsskólaaldri.