Í vetur mun Menntaskólinn á Ísafirði í fyrsta sinn krefjast þess að allir nemendur skólans verði með fartölvu. Vegna hagstæðra samninga sem náðust í útboði skólans í vor býður skólinn nemendum sínum upp á fullkomnar fartölvur frá HP gegn enn lægra leigu- og þjónustugjaldi heldur en fyrirhugað var í vor. Leigu- og þjónustugjaldið verður kr. 10.000,- á önn. Gegn því hafa nemendur tölvuna til fullra umráða allt árið, meðan þeir stunda nám við skólann. Gert er ráð fyrir því að nemendur eignist tölvuna þegar þeir hafa lokið fullu námi við skólann.

Um er að ræða HP G6060EA Notebook PC með AMD Athlon 64 X2 TK57, 2 Gb minni, DVD 2 hliða skrifara, vefmyndavél og hljóðnema. Nánari upplýsingar um tölvurnar er að finna hér.

 

Hafist verður handa við að afhenda fartölvur til nemenda eftir helgina, þ.e. mánudaginn 18. ágúst. Til að fá afhenta tölvu þurfa nemendur að undirrita samning við skólann og inna af hendi greiðslu annarinnar, kr. 10.000,-

Í ljósi vel heppnaðs útboðs hefur verið fallið frá því að skólinn leigi tölvur af þeim nemendum sem kjósa að vera með sínar eigin fartölvur. Þeir munu hinsvegar fá alla nauðsynlega þjónustu við tölvur sínar frá skólanum, sér að kostnaðarlausu. Þessir nemendur munu þurfa að koma með tölvurnar til skráningar á skrifstofu skólans svo þeir fái aðgang að neti skólans og þjónustu. Byrjað verður að taka við tölvum nemenda í þessu skyni eftir klukkan 13:00 miðvikudaginn 20. ágúst og munu nemendur jafnframt undirrita samning við skólann um aðganginn.

Til baka