Óhætt er að fullyrða að dagurinn í dag hafi einkennst af fjöri og forvitni. Í morgun mættu yfir 70 10.bekkingar úr skólunum hér á Vestfjörðum á opið hús, sem hefð er fyrir í MÍ á hverju vori. Í heimsókninni er nemendum ásamt kennurum sínum boðið að skoða skólann, kynnast félagslífinu og námsframboðnu. Dagskráin hófst á því að Heiðrún skólameistari og Dóróthea aðstoðarskólameistari buðu nemendur velkomna og héldu stuttar kynningar. Nýnemarnir Jensína og Tristan Ernir sögðu frá því hvernig er að byrja í MÍ og stjórn nemendafélagsins kynnti sig og sitt starf og sagði frá viðburðum o.fl. á vegum „nemó“.  Leikfélag MÍ bauð síðan upp á söng- og dansatriði úr Grease í Gryfjunni, en sýningar standa nú yfir á söngleiknum. Næsti liður á dagskrá var skoðunarferð leidd af nemendum MÍ og fengu gestir að skoða kennslustofur í bók- og verknámi og hitta kennara og nemendur. Komið var við í bókasafni skólans og litið var inn í herbergi á heimavist. Um leið tóku gestirnir þátt í ratleik þar sem svara þurfti nokkrum laufléttum spurningum og veglegt páskaegg var í verðlaun. Að lokum borðuðu allir saman í mötuneytinu.

Eftir hádegi mættu fulltrúar frá HÍ, Háskólanum á Hólum, Landbúnaðarháskólanum, Háskólasetri Vestfjarða og Lýðskólanum á Flateyri til að kynna námsframboð sitt ásamt MÍ. AFS var einnig með kynningu sem skiptinemar sáu um.  MÍ var einnig með bás þar sem snúa mátti lukkuhjóli með skemmtilegum vinningum auk þess sem gestum var boðið upp á candyfloss eða ullarbrjótsykur.

Vel heppnaður dagur er að baki og vonandi sjáum við sem flesta nýnema í MÍ í ágúst.

Starfsáætlun (skóladagatal) skólaársins 2025-2026 hefur verið tekin til afgreiðslu og samþykkt á skólaráðsfundi. Áður höfðu drög að áætluninni verið kynnt starfsfólki og því gefinn kostur á að koma með athugasemdir. 

Skóladagatal 2025-2026

Nýlega fóru nemendur á starfsbraut í heimsókn í Kertahúsið á Ísafirði. Þar tók Sædís Ólöf Þórsdóttir sem ásamt manni sínum er eigandi þessa litla fyrirtækis. Sagði Sædís nemendum söguna af því hvernig fyrirtækið varð til og bauð hún þeim að skoða vinnuaðstöðuna. Komust nemendur að því að ansi mörg handtök geta verið bak við gerð hvers kertis. Að lokum fékk hver nemandi að búa til ilmkerti til að taka með heim og var það toppurinn á þessari heimsókn að mati hópsins.

Leikfélag Menntaskólans á Ísafirði frumsýndi Sólrisuleikrit ársins 2025 síðastliðið föstudagskvöld fyrir fullu húsi í sal Edinborgarhússins. Að þessu sinni varð fyrir valinu rokksöngleikurinn sívinsæli Grease og er leikstjórn í höndum Birgittu Birgisdóttur. Mikil vinna liggur að baki uppsetningunni sem er hin glæsilegasta og hafa um 60 nemendur lagt hönd á plóg við hin ýmsu verkefni tengt sýningunni. Þar á meðal eru leikarar, hljómsveit, sviðsmenn, búningadeild, markaðsnefnd og tæknifólk svo eitthvað sé nefnt. Það er óhætt að mæla með að fólk skelli sér í leikhús og njóti afrakstursins hjá okkar hæfileikaríku nemendum. Alls verða sýndar 10 sýningar og miðasala fer fram á tix.is.  

Í gær fengu nemendur sem í áfanga í stjórnmálafræði Þorgerði Katrínu Gunnarsdóttur utanríkisráðherra í heimsókn ásamt Maríu Rut Kristinsdóttur alþingismanni sem er fyrrverandi nemandi MÍ. Svöruðu þær spurningum frá nemendum, en öðrum áhugasömum nemendum var einnig boðið að sækja tímann. Í lok heimsóknarinnar ræddu þær Þorgerður Katrín og María Rut við stjórnendur skólans um stöðuna á byggingu nýss verknámshúss.

Föstudaginn 28. mars verður Háskólakynning í Menntaskólanum á Ísafirði. Þar verða fulltrúar frá Háskóla Íslands, Háskólanum á Hólum, Landbúnaðarháskólanum, Háskólasetri Vestfjarða, Lýðskólanum á Flateyri og AFS að kynna sína starfssemi. Viðburðurinn stendur frá kl. 12:30-14 og er opinn öllum. 

Á dögunum leit Elfar Logi Hannesson leikhússtjóri Kómedíuleikhússins við til að að ræða hugmyndir um samstarf við MÍ. Samstarfið felst í því að nemendur í ákveðnum áföngum sæki reglulega leiksýningar Kómedíuleikhússins í Haukadal og verði einnig leitast við að bjóða öllum nemendum skólans upp á leikhúsupplifun í húsnæði skólans a.m.k. einu sinni á ári.

Kómedíuleikhúsið er eina atvinnuleikhúsið á Vestfjörðum. Frá stofnun leikhússins árið 1997 hefur verður settur á svið fjöldi leikverka sem eiga það flest sameiginlegt að tengjast með einum eða öðrum hætti sögu Vestfjarða. Nokkur dæmi eru Gísli Súrsson, Jón Sigurðsson strákur að vestan og Ariasman sem er nýjasta leikverk Kómedíuleikhúss.

MÍ tók ásamt flestum öðrum framhaldsskólum landsins þátt í Mín framtíð sem fram fór í Laugardalshöllinni í Reykjavík 13. – 15.mars. s.l. Verkiðn á veg og vanda af þessari árlegu framhaldsskólakynningu þar sem tilvonandi nemendur og aðrir gestir hafa tækifæri til að kynna sér námsframboð skólanna og hitta nemendur og starfsfólk.

Óhætt er að segja að bás MÍ hafi vakið mikla athygli en níu starfsmenn og 16 nemendur tóku þátt og skiptu með sér vöktum. Námsframboð, félagslíf, heimavist og margt fleira var kynnt með fjölbreyttum hætti. Boðið var upp á MÍ-smákökur og MÍ-drykki, lukkuhjól, gestabók og fleira skemmtilegt. Forseti Íslands, frú Halla Tómasdóttir var meðal gesta og átti hún gott spjall við starfsfólk og nemendur MÍ.

Þá fór einnig fram Íslandsmót iðn- og verkgreina þar sem nemendur keppa í samtals 19 iðngreinum. Þeir fá þannig tækifæri til að takast á við krefjandi og raunveruleg verkefni sem reyna á hæfni, skipulagshæfileika og fagmennsku. Benedikt Þórhallsson húsasmíðanemi keppti fyrir hönd MÍ og var hægt að fylgjast með honum að smíða tröppu. Samnemendur Benedikts tóku þátt í undirbúningi fyrir keppnina og veittu einnig mikilvægan stuðning á meðan keppnin stóð yfir.

Nemendur og starfsfólk eru í stuttu máli mjög ánægð með framlag skólans á Mín framtíð og er stefnt að því að taka aftur þátt að ári.

Í dag 17. mars hefst valtímabil fyrir haustönn 2025 og stendur það yfir til 21. mars.

Nemendur sem ætla að vera áfram í námi í MÍ þurfa að velja sér áfanga. Þetta á við um dagskólanemendur og fjarnemendur sem eru með MÍ sem heimaskóla. Opnað verður fyrir umsóknir í almennt fjarnám 22. apríl og verður auglýst nánar síðar.
Hægt er að fá aðstoð hjá aðstoðarskólameistara, áfanga- og fjarnámsstjóra, náms- og starfsráðgjafa og skólameistara við valið. Hægt er að panta tíma hjá þeim á skrifstofu skólans eða með því að bóka tíma hér.

Nemendur sem stefna á útskrift á haustönn þurfa að panta tíma hjá áfanga- og fjarnámsstjóra eða náms- og starfsráðgjafa til að fara yfir valið.

Hér eru allar upplýsingar um hvernig valið fer fram eftir brautum.

Hér er yfirlit yfir alla áfanga sem eru í boði á haustönn 2025.

Sólrisuleikrit Menntaskólans á Ísafirði er ein af þessum gömlu og góðu hefðum skólans. Í ár varð hinn vinsæli söngleikur Grease fyrir valinu hjá leikfélaginu. Öll sem koma að leiksýningunni hafa lagt hart að sér síðustu vikurnar og eru þau mjög spennt að sýna bæjarbúum afraksturinn.

Frumsýning verður 22.mars kl. 20:00 og er sýnt í Edinborgarhúsinu á Ísafirði. Leikstjóri er Birgitta Birgisdóttir. 

Miðasala hefst í dag föstudaginn 14.mars klukkan 12:00 og fer fram á tix.is 

Sjá einnig viðburð á Facebook.