Opnað hefur verið fyrir umsóknir um fjarnám á vorönn 2025.
Allar upplýsingar um fjarnámið í MÍ má finna hér

Menntaskólinn á Ísafirði leitar að módeli í tímabundið verkefni sem felur í sér að sitja fyrir í myndlistartíma. Um er að ræða eftirfarandi tímasetningar:

28. október kl. 9-11:45
11. nóvember kl. 9-11:45
18. nóvember kl. 9-11:45

Viðkomandi þarf að sitja fyrir í 15-20 mínútur í senn án fata eða í sundfötum og vera fær um að sitja kyrr og starfa í skapandi umhverfi listkennslu. Greitt er samkvæmt taxta Myndlistarskóla Reykjavíkur. Áhugasamir geta haft samband við skólann á netfangið misa@misa.is.

Í dag, á alþjóðadegi kennara, voru kynntar tilnefningar til Íslensku menntaverðlaunanna en verðlaunin verða veitt á Bessastöðum 5 nóvember n.k. Við í MÍ erum ákaflega stolt af því að eiga í hópnum einn kennara, Þröst Jóhannesson húsasmíðakennara, sem tilnefndur er í flokki iðn- og verkemenntunar en flokkurinn tekur til kennara, námsefnishöfunda, skóla- eða menntastofnunar fyrir framúrskarandi starf, verk eða annað framlag til iðn- eða verkmenntunar. Við óskum Þresti innilega til hamingju með tilnefninguna og öllum kennurum til hamingju með alþjóðadag kennara.

Þröstur lauk námi til kennsluréttinda frá Háskóla Íslands 2008 en áður hafði hann lokið meistaranámi í húsasmíði. Þröstur hefur kennt við Menntaskólann á Ísafirði frá 1987 og lengst af verið kennari  í húsasmiðagreinum. Undanfarin ár hefur hann verið sviðsstjóri starfs- og verknáms auk þess að sitja í verkefnastjórn vegna byggingar nýs verknámshúss. 

Í húsasmíðakennslunni hefur Þröstur verið óhræddur við að leita nýrra leiða. Hann hefur til dæmis nýtt sér samlegðaráhrif við Fab lab-smiðjuna í skólanum í kennslu og náð góðum árangri í að tengja húsasmíði við tæknina sem þar er til staðar. Hann hefur komið á breytingum í teikniáföngum svo þeir séu betur tengdir nútímatækni og þeim veruleika sem bíður nemenda eftir útskrift. Hann hefur lagt mikla áherslu á umhverfismál í störfum sínum, t.d. þegar hugað er að nýtingu á efni í húsasmíðakennslunni.  

Þröstur hefur lagt mikla áherslu á öryggismál og er umhugað um að nemendur tileinki sér góð vinnubrögð, meðal annars með tilliti til öryggisatriða. Þresti hefur lagt áherslu á að haga kennslunni þannig að hún búi nemendur sem best undir húsasmíðastörf í framtíðinni. Allan sinn kennsluferil hefur hann verið í mjög góðum samskiptum við atvinnulífið sem hefur skilað sér vel inn í kennsluna.  

Þröstur hefur fengist við félagsstörf tengt íþróttum og kennt skíðagöngu. Hann keppti fyrir Íslands hönd í skíðagöngu á vetrarólympíuleikunum 1980. 

Úr umsögn sem fylgdi tillögu að tilnefningu: Þröstur er mjög lausnamiðaður, bæði í kennslu sinni og störfum. Hann hefur t.d. búið við frekar slaka kennsluaðstöðu í húsasmíðagreinum við skólann en hann hefur aldrei látið það hafa áhrif á kennsluna heldur unnið með aðstöðuna og verið mjög lausnamiðaður í að nýta rýmið sem best til kennslu. 

Þröstur er þekktur fyrir einstaka prúðmennsku  bæði meðal nemenda og starfsmanna og það er óhætt að segja að Þröstur búi yfir stóískri ró sem hefur mjög góð áhrif á þau sem eru í kringum hann.  

Nemendur Þrastar hafa í gegnum tíðina bundist honum tryggðarböndum og vil ég vitna beint í einn nemanda hans sem sagði mér á dögunum að Þröstur væri svo mikil GOAT eða Greatest Of All Times. Það er líklega ekki hægt að fá betri meðmæli sem kennari.  

Þröstur hefur allan sinn tíma sýnt mikla hollustu við húsasmíðakennsluna og skólann. Hann er einstök fyrirmynd, bæði fyrir nemendur og starfsfólk og framúrskarandi kennari. 

Á haustdögum fengum við Eirík Rögnvaldsson fyrrverandi prófessor í íslenskri málfræði til að halda erindi fyrir alla nemendur um allskonar íslensku. Í kjölfar erindisins ræddi Ólafur Guðsteinn Kristjánsson um verkefnið Gefum íslensku séns – íslenskuvænt samfélag  sem miðar að því að auka möguleika fólks í notkun íslensku á sem víðtækastan og fjölbreyttastan hátt. Markmiðið er að fólk sem lærir málið fái stuðning og skilning þeirra sem hafa vald á íslensku auk þess sem því er ætlað að vekja samfélagið til vitundar um það hvernig við getum öll stuðlað að framförum fólks í íslensku og að fólk hafi tækifæri til að nota málið við sem flest tækifæri.

Kennarar og nemendur í MÍ hafa strax tekið við sér og nú hafa verið skipulagðir vikulegir tímar þar sem þau sem hafa íslensku að móðurmáli og þau sem hafa annað móðurmál en íslensku spjalla saman á íslensku. Verkefnið höfum við kosið að kalla Gefum íslensku séns í MÍ og er það innblásið af verkefni Ólafs Guðsteins og félaga hjá Háskólasetri Vestfjarða. Verkefnið fer virkilega vel af stað, mikill áhugi og frábær þátttaka hjá nemendum. Um fjórðungur nemenda Menntaskólans á Ísafirði hefur annað móðurmál en íslensku og alls eru töluð hátt í tuttugu tungumál í skólanum. Við fögnum fjölbreytileikanum og viðurkennum að við erum allskonar og það er hægt að tala allskonar íslensku.

Tíu nemendur á Lista- og nýsköpunarbraut Menntaskólans á Ísafirði héldu til Finnlands í byrjun vikunnar ásamt kennurunum sínum þeim Ólöfu Dómhildi og Andreu. Ferðin er hluti af Erasmus plús verkefnum skólans og stendur yfir í 5 daga. Í ferðinni hafa þau m.a. heimsótt Herttoniemen Yhteiskoulu framhaldsskólann í Helsinki, Haltia náttúrusafnið og Noux þjóðgarðinn. EInnig stendur til að fara að sjá íslensk leikverk á finnsku, baka, fara í saunu og margt fleira. Yfirskrift ferðarinnar er List og náttúra og endurspeglast það í dagskrá ferðarinnar og þeim verkefnum sem nemendur taka sér fyrir hendur á meðan þau eru í Finnlandi.  

Í dag er forvarnardagurinn haldinn í 19. skipti í grunn- og framhaldsskólum landsins. Af þessu tilefni var dagskrá í gryfjunni í gær þar sem forvarnir voru í fyrirrúmi. Erna Sigrún forvarnarfulltrúi og Helena skólahjúkrunarfræðingur voru með erindi og fjölluðu meðal annars um skaðsemi áfengis, tóbaks og orkudrykkja. Dregið var úr hinum svokallaða fyrirmyndarpotti en allir nemendur sem blása í áfengismæli á böllum fara í pottinn og að þessu sinni voru verðlaunin 20.000kr gjafabréf í versluninni Djúpinu. Sú heppna var að þessu sinni Martyna Maria Wielgosz nemi á fyrsta ári. Jón Gunnar gjaldkeri nemendafélagsins kom einnig upp og kynnti klúbbastarf nemenda sem verið er að hleypa af stokkunum. Hugmyndafræði klúbbastarfsins er að gefa sem flestum rými og tíma til þess að eiga í félagslegum samskiptum í skólanum tengt áhugamálum. Þátttaka í tómstundastarfi er einn af þeim þáttum rannsóknir hafa sýnt að sé verndandi í lífi ungmenna og líkleg til að koma í veg fyrir frávikshegðun. Í lok dagskrár var boðið upp á ávexti og sódavatn í boði ölgerðarinnar Egils. 

Klúbbarnir byrja á að hittast í dag, miðvikudag kl. 16 í skólanum. Byrjað verður með listaklúbb, borðtennisklúbb, spilaklúbb og skákklúbb og allir nemendur hvattir til að skrá sig.  Nemendum er frjálst að koma með hugmyndir að nýjum klúbbum. Starfsmenn verða nemendum innan handar til að byrja með en síðan er markmiðið að klúbbarnir verði að mestu sjálfbærir.

Mikið hefur drifið á daga nemenda okkar í Sables í Frakklandi undanfarna viku. Þau dvelja á heimilum franskra nemenda, verja bæði tíma með fjölskyldum þeirra og mæta í skólann með þeim. Ýmislegt fleira hefur verið skipulagt fyrir utan skóla. Á föstudag var farið í gönguferð þar sem nemendur í ferðamáladeild skólans leiðsögðu um gamla bæinn í Sables. Eftir hádegi var farið á ströndina og á brimbrettanámskeið þar sem allir þátttakendur náðu að standa á brimbretti í frábæru veðri, sól og hita. Á mánudag var farið í rútuferð til borgarinnar La Rochelle sem er í um tveggja tíma akstur sunnan við Sables. Borgin er gömul og saga hennar er mjög áhugaverð. Meðal annars í tengslum við seinni heimstyrjöldina. Þennan dag var grenjandi rigning en nemendur létu það ekki á sig fá. Við gengum stuttan hring um miðbæinn í fylgd franska kennarans og síðan fóru nemendur í ljósmyndamaraþon sem stóð til hádegis. Eftir hádegið var farið í heimsókn í sædýrasafn. Á þriðjudag voru nemendurnir í tímum með sínum tengiliðum og um kvöldið var kveðjuveisla í skólanum þar sem allir komu með mat að heiman, frábær stemming og mikið sungið og dansað. Á morgun taka þau lestina til Parísar þar sem þau hitta Svavar Þór kennara og verður hann með þeim ásamt Nadju frönskukennara í fjóra daga að skoða borgina.

Í dag hófst evrópska íþrótta- og hreyfivikan sem merkt er myllumerkinu #BeActive. Markmið vikunnar er að kynna íþróttir og almenna hreyfingu um alla Evrópu. Íþrótta- og hreyfivikan er ætluð öllum óháð aldri, bakgrunni eða líkamlegu ástandi. Nemendur og starfsfólk MÍ fá m.a. frítt í Stöðina - heilsurækt og næstu daga verður bryddað upp á ýmsum viðburðum hér í skólanum sem hvetja okkur til meiri hreyfingar í daglegu lífi. Kolbrún Fjóla íþróttakennari hefur haldið utan um dagskrána og nánari upplýsingar má finna hér: Beactive 2024

Í gær héldu 12 nemendur úr MÍ út til Frakklands að heimsækja franskan vinaskóla MÍ sem heitir Lycée Sainte Marie du Port og er í strandbænum Les Sables d´Olonne á vesturströnd Frakklands. Með í för eru þær Nadja Widell frönskukennari og Hildur Halldórsdóttir alþjóðafulltrúi sem skiptir svo við Svavar Þór Guðmundsson í næstu viku.
Nemendur franska skólans komu til Ísafjarðar í apríl sl. og nú er verið að endurgjalda þá heimsókn. Nemendaskipti sem þessi hafa verið fastur liður í skólastarfi MÍ síðan 2004 og ávallt mikið tilhlökkunarefni enda bæði þroskandi og lærdómsríkt að taka þátt í verkefni af þessu tagi. Ferðin er hluti af Erasmus+ verkefnum skólans og er styrkt af Evrópusambandinu. Nemendur MÍ munu dvelja alls 10 daga í Frakklandi, um viku í Sables þar sem þau gista á frönskum heimilum og svo nokkra daga í París í lok ferðar. Á meðfylgjandi mynd má sjá hópinn ásamt frönsku nemendunum og kennurum þeirra. 

Í dag tóku dagskólanemendur og starfsfólk MÍ þátt í málþingi í Edinborgarhúsinu sem bar yfirskriftina Við öll í MÍ.

Málþingið hófst kl. 9 með stuttu innslagi frá Villa Neto um mikilvægi þess að það þurfi ekki að tala fullkomlega til að skiljast eða eins og hann sagði beint – þeir skilja sem vilja! Síðan stýrðu þær Jovana Pavlovic og Sema Erla Serdaroglu fræðslu og vinnustofum um fordóma, ólíka menningu, steríótýpur og fjölmenningarsamfélag.  Áhugaverðar umræður sköpuðust í vinnustofunum um fordóma, inngildingu og fjölmenningu svo fátt eitt sé nefnt.

Alls voru þátttakendur á námskeiðinu hátt í 250. Vel fór um þennan stóra hóp í Edinborgarhúsinu og í hádeginu var öllum hópnum síðan boðið í hamborgaraveislu á Edinborg Bistro.

Það er von okkar í MÍ að málþingið hafi verið öllum þátttakendum til gagns. Málefnin sem til umfjöllunar voru eru flókin en mikilvæg og nauðsynlegt fyrir okkur öll að halda umræðunni áfram. Munum að við í MÍ erum allskonar og við fögnum fjölbreytileikanum!

Málþingið hlaut styrk frá Þróunarsjóði innflytjendamála.