Í gær héldu 12 nemendur úr MÍ út til Frakklands að heimsækja franskan vinaskóla MÍ sem heitir Lycée Sainte Marie du Port og er í strandbænum Les Sables d´Olonne á vesturströnd Frakklands. Með í för eru þær Nadja Widell frönskukennari og Hildur Halldórsdóttir alþjóðafulltrúi sem skiptir svo við Svavar Þór Guðmundsson í næstu viku.
Nemendur franska skólans komu til Ísafjarðar í apríl sl. og nú er verið að endurgjalda þá heimsókn. Nemendaskipti sem þessi hafa verið fastur liður í skólastarfi MÍ síðan 2004 og ávallt mikið tilhlökkunarefni enda bæði þroskandi og lærdómsríkt að taka þátt í verkefni af þessu tagi. Ferðin er hluti af Erasmus+ verkefnum skólans og er styrkt af Evrópusambandinu. Nemendur MÍ munu dvelja alls 10 daga í Frakklandi, um viku í Sables þar sem þau gista á frönskum heimilum og svo nokkra daga í París í lok ferðar. Á meðfylgjandi mynd má sjá hópinn ásamt frönsku nemendunum og kennurum þeirra. 

Í dag tóku dagskólanemendur og starfsfólk MÍ þátt í málþingi í Edinborgarhúsinu sem bar yfirskriftina Við öll í MÍ.

Málþingið hófst kl. 9 með stuttu innslagi frá Villa Neto um mikilvægi þess að það þurfi ekki að tala fullkomlega til að skiljast eða eins og hann sagði beint – þeir skilja sem vilja! Síðan stýrðu þær Jovana Pavlovic og Sema Erla Serdaroglu fræðslu og vinnustofum um fordóma, ólíka menningu, steríótýpur og fjölmenningarsamfélag.  Áhugaverðar umræður sköpuðust í vinnustofunum um fordóma, inngildingu og fjölmenningu svo fátt eitt sé nefnt.

Alls voru þátttakendur á námskeiðinu hátt í 250. Vel fór um þennan stóra hóp í Edinborgarhúsinu og í hádeginu var öllum hópnum síðan boðið í hamborgaraveislu á Edinborg Bistro.

Það er von okkar í MÍ að málþingið hafi verið öllum þátttakendum til gagns. Málefnin sem til umfjöllunar voru eru flókin en mikilvæg og nauðsynlegt fyrir okkur öll að halda umræðunni áfram. Munum að við í MÍ erum allskonar og við fögnum fjölbreytileikanum!

Málþingið hlaut styrk frá Þróunarsjóði innflytjendamála.

Nemendafélag MÍ stóð fyrir íþrótta- og leikjadegi í dag þar sem ýmislegt skemmtilegt var brallað í stað þess að mæta í hefðbundnar kennslustundir. Dagurinn byrjaði á furðufataskemmtiskokki í blíðuveðri þar sem meðal hlaupara voru ýmsar undarlega klæddar verur eins og meðfylgjandi myndir sýna. Fleira skemmtilegt var boðið upp á eins og bandí, boccia, skák, snúsnú, spil, karíókí og borðtennis. Var ekki annað að sjá en að nemendur og starfsfólk skemmtu sér vel. 

Fimmtudaginn 12. september frá kl. 9-15 stendur Menntaskólinn á Ísafirði fyrir málþingi og vinnustofum í Edinborgarhúsinu á Ísafirði undir yfirskriftinni Við öll í MÍ. Þar munu Jovana Pavlovic og Sema Erla Serdaroglu stýra fræðslu og vinnustofum um fordóma, ólíka menningu, steríótýpur og fjölmenningarsamfélag. 

Jovana Pavlovic er mannfræðingur, og markaðs- og verkefnastjóri og fjölmenningafulltrúi hjá Símenntun Vesturlands og Sema Erla Serdaroglu er aðjúnkt við HÍ í tómstunda- og félagsmálafræði. Í rannsóknum sínum hefur Sema Erla einblínt á kynþátta- og menningarfordóma, einelti og ungt fólk og ofbeldisfulla öfgahyggju. 

Málþingið og vinnustofurnar eru fyrir alla dagskólanemendur í MÍ og starfsfólk, hátt í 250 manns. 25% dagskólanemenda í skólanum hafa annað móðurmál en íslensku og alls eru töluð hátt í 20 ólík tungumál í skólanum. Inngilding er áhersluatriði  í skólastarfinu alla daga og mikill vilji til þess að gera henni enn hærra undir höfði. Hugmyndin á bak við þennan dag kviknaði síðasta vetur og fékkst styrkur frá Þróunarsjóði innflytjendamála fyrir verkefninu. 

Í tengslum við málþingið verður fræðslufundur fyrir foreldra/forsjáraðila og starfsfólk MÍ miðvikudaginn 11. september kl. 20 í fyrirlestrarsal skólans og verður sá fundur einnig í boði í beinu streymi.

Stöðupróf í albönsku, arabísku og víetnömsku verða haldin í Kvennaskólanum í Reykjavík föstudaginn 8. nóvember kl. 14:30.

Prófin verða í húsnæði Kvennaskólans að Fríkirkjuvegi 1. 

Mest geta nemendur fengið 20 einingar metnar, 15 einingar á 1. þrepi og 5 einingar á 2. þrepi.

Skráning fer fram á heimasíðu skólans og þarf að skráningu að vera lokið í síðasta lagi mánudaginn 4. nóvember. Prófgjald er kr. 20.000 sem greiðist með því að leggja það inn á reikning: 0513-26-14040, kt. 650276-0359. Nauðsynlegt er að nafn og kennitala próftaka komi fram á innlegginu. Vinsamlegast sendið afrit af kvittuninni á gudnyrun@kvenno.is.

Réttur til próftöku byggist á að prófgjald hafi verið greitt og auk þess verða próftakar að framvísa persónuskilríkjum með mynd þegar komið er í prófið. Athugið að í stöðuprófi er gert ráð fyrir sérstakri færni í tungumálinu t.d. ef um er að ræða annað móðurmál viðkomandi eða búsetu erlendis.

Skráningarhlekkur: https://forms.office.com/e/etF6gyyiar

Nánari upplýsingar veitir Björk áfangastjóri (bjorkth@kvenno.is)

Stöðupróf í albönsku, arabísku og víetnömsku | Kvennaskólinn í Reykjavík (kvenno.is)

Gulur september er samvinnuverkefni stofnana og félagasamtaka sem vinna saman að geðheilbrigði og sjálfsvígsforvörnum. Markmið verkefnisins er að auka meðvitund fólks um mikilvægi geðræktar og sjálfsvígsforvarna. Á morgun, 10. september, er svo Guli dagurinn og þá klæðumst við gulu til merkis um kærleika, aðgát og umhyggju en 10. september er alþjóðlegur forvarnardagur sjálfsvíga. 

Að gulum september standa fulltrúar frá: Embætti landlæknis, Geðhjálp, Heilsugæslu höfuðborgarsvæðisins, Landspítala, Minningarsjóði Orra Ómarssonar, Píeta samtökunum, Rauða krossinum, SÁÁ, Sorgarmiðstöð, Þjóðkirkjunni og Þróunarmiðstöð íslenskrar heilsugæslu. Nánari upplýsingar um gulan september má finna á heimasíðu geðhjálpar: https://gedhjalp.is/gulur-september/

Nemendur og starfsfólk MÍ klæddust bleiku í dag til að sýna samstöðu og heiðra minningu Bryndísar Klöru. Það var falleg samverustund í gryfjunni þar sem Unnur Guðfinna Daníelsdóttir formaður nemendafélags MÍ og Heiðrún Tryggvadóttir skólameistari ávörpuðu hópinn. Vakin var athygli á mikilvægi þess að við sýnum öll sem eitt samstöðu í að stöðva ofbeldi. Fjölskyldu og vinum Bryndísar Klöru og skólasamfélaginu í Verslunarskóla Íslands eru færðar samúðarkveðjur frá okkur öllum í MÍ.

Kæru nemendur og foreldrar/forsjáraðilar

Þessi póstur er sendur á alla dagskólanemendur og foreldra/forsjáraðila þeirra í Menntaskólanum á Ísafirði. Samskonar póstur er sendur á foreldra/forsjáraðila allra framhaldsskólanemenda á Íslandi.

Áhyggjur af auknum vopnaburði og ofbeldi meðal barna og unglinga hafa farið vaxandi og hafa alvarleg atvik undanfarið ýtt undir þann ótta. Við þessu er mikilvægt að bregðast. Menntaskólinn á Ísafirði áréttar að vopnaburður á almannafæri er lögum samkvæmt bannaður. Ef nemandi verður uppvís að því að bera vopn verður málið undantekningalaust tilkynnt til lögreglu, og eftir atvikum til barnaverndar ef um nemanda undir 18 ára aldri er að ræða, auk þess sem haft verður samband við foreldra/forsjáraðila. Ofbeldismál sem upp koma innan skólans eða viðburðum í hans nafni verða sett í viðeigandi ferli og unnin eftir viðbragðsáætlun skólans sem finna má hér ásamt skólareglum sem finna má hér. Við hvetjum nemendur og foreldra/forsjáraðila til að kynna sér bæði viðbragðsáætlunina og skólareglurnar en tekið skal fram að endurskoðun á viðbragðsáætlun skólans stendur yfir.

Mikilvægt er að nemendur og foreldrar/forsjáraðilar taki þátt í að bregðast við þessari þróun og geri allt sem í sínu valdi stendur til að koma í veg fyrir ofbeldi og vopnaburð. Við í MÍ hvetjum nemendur og foreldra/forsjáraðila til að ræða saman um hvernig við sköpum í sameiningu öruggara samfélag, þ á.m. um að það sé ólöglegt að ganga um með vopn, hverjar afleiðingar ofbeldis geta verið og hvert hægt er að leita að stuðningi.

Ákveðnir þættir eru verndandi gegn áhættuhegðun unglinga s.s. samvera foreldra og unglinga, að fylgst sé með netnotkun þeirra, að unglingum sé sýnd umhyggja og þeim séu sett skýr mörk sem og að foreldrar/forsjáraðilar þekki vini unglinga sinna og foreldra /forsjáraðila þeirra. Jafnframt felst  mikið forvarnargildi í þátttöku unglinga í skipulögðu íþrótta- og tómstundastarfi og mikilvægt er að foreldrar/forsjáraðilar séu virkir þátttakendur í foreldrastarfi. Við bendum í því samhengi á Facebook-hóp foreldraráðs MÍ.

Vakin er athygli á að nemendur og foreldrar/forsjáraðilar geta leitað stuðnings og ráðgjafar innan skólans svo sem hjá námsráðgjafa, skólahjúkrunarfræðingi, umsjónarkennurum eða stjórnendum. Þá bendum við á Hjálparsíma Rauða Krossins 1717 og netspjall á www.1717.is og á  www.112.is.

Við bendum á að á okkur öllum  hvílir tilkynningarskylda til barnaverndar ef ástæða er til að ætla að barn eða unglingur verði fyrir ofbeldi eða annarri vanvirðandi háttsemi eða stofni heilsu sinni og þroska í alvarlega hættu. Það sama á við ef barn eða unglingur beitir ofbeldi eða annarri vanvirðandi háttsemi.

Í sameiningu getum við stuðlað að öruggara samfélagi og aukinni farsæld. Við hvetjum ykkur til að hafa samband við skólann ef einhverjar spurningar vakna.

Virðingarfyllst, Heiðrún Tryggvadóttir skólameistari Menntaskólans á Ísafirði

Við eigum nokkur laus pláss í skyndihjálp á haustönn 2024.
Nánari upplýsingar og skráning er hjá Mörthu áfangastjóra, martha@misa.is

Nemendur í náttúruvísindum á starfsbraut nýttu blíðviðrið á dögunum og fóru í berjamó upp í Stórurð. Að sögn Sigríðar Gísladóttur náttúrufræðikennara var markmið tímans var að njóta útiveru, kynnast náttúrunni í nærumhverfinu og að læra að þekkja í sundur villt ber. Er ekki annað að sjá á meðfylgjandi myndum en að þetta hafi tekist prýðilega, nemendur að vanda áhugasamir og berin ljúffeng.