Háskóladagurinn 2021 verður haldinn laugardaginn 27. febrúar n.k. Að þessu sinni verður dagurinn og viðburðir honum tengdir alfarið á netinu vegna samkomutakmarkana af völdum Covid-19. Í síðustu viku var opnaður ný vefur Háskóladagsins, haskoladagurinn.is sem mun einfalda aðgengi allra að upplýsingum um það háskólanám sem er í boði á landinu. 

Á laugardaginn kemur munu um 300 fjarfundir tengjast vefnum þar sem hægt verður að fá upplýsingar um allar námsbrautir en á fjarfundunum geta áhugasamir spurt spurninga um námið og spjallað við fulltrúa háskólanna, nemendur og kennara. Á vefnum er afar öflug og einföld leitarvél sem auðveldar verðandi nemendum að finna draumanámið.

Um síðustu mánaðamót hóf Pernilla Rein MS í bókasafns- og upplýsingafræði störf við skólann. Pernilla hefur verið ráðin sem yfirmaður bókasafns skólans og skjalavörður. Hún tekur þar með við af Júlíu Björnsdóttur sem sinnt hefur þessum störfum s.l. þrjú og hálft ár. Viðvera Pernillu á bókasafninu er á milli kl. 9 og 12 alla virka daga og nemendur og kennarar eru hvött til þess að nýta sér þjónustuna sem í boði er. Við hlökkum til samstarfsins við Pernillu er bjóðum hana velkomna til starfa við MÍ.

Í gær settust um 20 nemar í iðnmeistaranámi á skólabekk í MÍ. Nokkuð er um liðið síðan nám til iðnmeistara var kennt við skólann síðast og góð þátttaka í náminu er sérstaklega ánægjuleg. Kennt verður nokkra miðvikudaga og flesta fimmtudaga frá kl. 18-21 og áætlað er að kennslu á önninni ljúki í lok apríl. Námið tekur þrjár annir og eru um 11 einingar kenndar á hverri önn. Á kynningarfundi og fyrstu kennslustund í gær var góð mæting og eftirvænting í loftinu. Heiðrún Tryggvadóttir áfangastjóri og Þröstur Jóhannesson húsasmíðakennari munu sjá um kennslu í áfanganum Kennsla og leiðsögn sem kenndur verður í hverri viku en aðrir kennarar eru Una Þóra Magnúsdóttir sem kennir Almenna lögfræði og reglugerðir, Heiða Jónsdóttir sem kennir Grunn að gæðahandbók og Ísól Fanney Ómarsdóttir sem kennir Aðferðir verkefnastjórnunar. Þær munu kenna í styttri lotum. Námið mun einnig fram á Teams en einn nemandi er í fjarnámi frá Reykhólum. 

Þá er fyrstu kennsluviku vorannar lokið. Við í MÍ erum mjög glöð og ánægð að hafa getað hitt nemendur í skólahúsnæðinu og að skólastarfið geti farið af stað í staðkennslu. Við erum líka stolt og þakklát fyrir hversu vel nemendur hafa farið að öllum tilmælum um sóttvarnir og grímunotkun. Þeir eruð til fyrirmyndar! 

Skólastarf næstu viku verður með sama sniði og þessa vikuna nema við gerum örlitlar breytingar á opnunartíma mötuneytisins. Við minnum síðan á að kennsla á afreksíþróttasviði hefst í næstu viku.

Hér má lesa nánar um skólastarfið í næstu viku.

Nú er fyrstu umferð í Gettu betur lokið og ljóst hvaða lið komast áfram í 16 liða úrslit. Lið MÍ var annað stigahæsta tapliðið og mun mæta liði Fjölbrautarskólans í Garðabæ í næstu viðureign. Önnur umferð keppninnar fer fram í næstu viku á Rás 2 og MÍ og FG eigast við í beinni útsendingu þriðjudaginn 12. janúar kl. 20.10. 

Til hamingju með árangurinn og áfram MÍ!

Í dag 6. janúar hófst kennsla í MÍ eftir jólaleyfi. Þau gleðilegu tímamót eru jafnframt að nú koma allir nemendur í skólann, bæði nemendur í verk- og starfsnámi og í bóknámi. Reglugerð frá 1. janúar um fjöldatakmarkanir í skólastarfi gerir þetta mögulegt, að því tilskyldu að grímur séu notaðar þar sem ekki næst að halda tveggja metra fjarlægð og hópastærðir fara ekki yfir 30 einstaklinga. 

Þessu fögnum við öll og starfsfólk MÍ býður nemendur hjartanlega velkomin aftur í skólann.

Fyrsta umferð Gettu betur 2021 hófst þann 4. janúar og í kvöld er komið að MÍ. Lið skólans mætir liði Menntaskólans á Laugarvatni kl. 19:00. Viðureignin er í beinni á ruv.is/null og allir eru hvattir til að fylgjast með.

Að þessu sinni er liðið skipað þeim Dagbjörtu Ósk Jóhannsdóttur, Davíð Hjaltasyni og Einari Geir Jónassyni. Strákarnir eru að keppa í 3. skipti en Dagbjört er nýliði. Í fyrra komst MÍ eftirminnilega í sjónvarpið í átta liða úrslit og er stefnan að sjálfsögðu sett þangað aftur. Þjálfari liðsins er, eins og undanfarin ár, Veturliði Snær Gylfason.

Áfram MÍ!

Þann 18. desember s.l. voru 20 nemendur brautskráðir við athöfn í Ísafjarðarkirkju. Vegna fjöldatakmarkana voru aðeins útskriftarnemar viðstaddir, ásamt tónlistarfólki og nokkrum úr hópi stjórnenda og starfsfólks, en streymt var frá athöfninni.

Að þessu sinni voru brautskráðir nemendur af 6 brautum. Einn nemandi lauk námi af lista- og nýsköpunarbraut, 3 sjúkraliðar útskrifuðust og 17 nemendur luku námi af stúdentsprófsbrautum. Þrír af félagsvísindabraut, þrír af náttúruvísindabraut, níu af opinni stúdentsbraut og tveir með stúdentspróf af fagbraut. Verðlaun fyrir góðan námsárangur hlaut Ingveldur Hera Magnúsdóttir sem útskrifaðist sem sjúkraliði og stúdent af fagbraut. Glóð Jónsdóttir hlaut viðurkenningu fyrir einstaka þrautseigju og seiglu í námi.

Við upphaf athafnarinnar lék Oliver Rähni nemandi skólans á 2. ári etýðu Op. 8, No. 11 eftir Alexander Scriabin á píanó. Síðan stýrðu Hildur Halldórsdóttir aðstoðarskólameistari og Heiðrún Tryggvadóttir áfangastjóri brautskráningu og afhendingu verðlauna. Þá fluttu nýstúdentarnir Andri Fannar Sóleyjarson og Magni Jóhannes Þrastarson lagið My way og Pétur Ernir Svavarsson lék með þeim á píanó. Að lokum ávarpaði Jón Reynir Sigurvinsson skólameistari nýstúdenta og sjúkraliða og óskaði þeim heilla í framtíðinni.

Nú um áramótin tók gildi ný reglugerð um takmörkun á skólastarfi vegna farsóttar Reglugerðin felur í sér ánægjulegar breytingar en skv. henni er skólastarf á framhaldsskólastigi heimilt að uppfylltum ákveðnum skilyrðum um sóttvarnir. Ljóst er að reglugerðin mun falla úr gildi ef smitum fjölgar í samfélaginu. Óvissan við upphaf vorannar er því mikil. Það mun því reyna á okkur öll eins og áður að láta skólastarfið ganga - með hvaða hætti sem það verður. Saman munum við geta þetta!

Veigamesta atriðið í reglugerðinni fyrir okkur í MÍ er að blöndun milli hópa er leyfileg sem þýðir að við getum haldið af stað inn í vorönnina með kennslu í skólahúsnæðinu skv. stundatöflu.

Áfram munu ýmsar reglur gilda um smit- og sóttvarnir sem kynntar verða betur þegar skólinn hefst en allir nemendur þurfa að búa sig undir að nota grímur í skólanum því fyrst um sinn a.m.k. verður grímuskylda. Grímur er að finna við alla innganga í skólann.

Ákveðið hefur verið að þriðjudaginn 5. janúar verði ekki kennd hraðstundatafla eins og til stóð. Kennsla mun hefjast skv. stundatöflu miðvikudaginn 6. janúar. Kennsla á afreksíþróttasviði hefst 11. janúar.

Stundatafla og töflubreytingar:

Opnað verður fyrir stundatöflur í INNU mánudaginn 4. janúar. Þar má einnig sjá bókalista. Þennan dag verða rafrænar töflubreytingar í boði (nánar kynnt síðar). Töflubreytingar hjá áfangastjóra og náms- og starfsráðgjafa verða í boði þriðjudaginn 5. janúar frá kl. 13:00. Hægt er að panta tíma hér eða hjá ritara skólans. Til að forðast hópamyndun þarf að panta tíma!

Mötuneyti opið:

Frá og með miðvikudeginum 6. janúar verður mötuneytið opið. 30 manns mega vera í mötuneytinu í einu og til að koma sem flestum að verður opnunartímanum því skipt í þrennt:

1. hópur 11:55-12:15, síðan tekur við sóttvarnarhlé
2. hópur 12:25-12:50, síðan tekur við sóttvarnarhlé
3. hópur 13:00-13:20

Skólastarfið í skólahúsnæðinu:

• Áhersla er á einstaklingsbundnar sóttvarnir
• 2 metra reglan er í gildi en þar sem henni verður ekki viðkomið þarf að nota grímur. Þar sem viðbúið er að 2 metra reglan verði víða erfið í framkvæmd er grímuskylda í öllu skólahúsnæðinu. Grímur er að finna við alla innganga í skólann.
• Þegar komið er inn í skólahúsnæðið er mikilvægt að allir spritti sig Sótthreinsa þarf skólastofur í lok hverrar kennslustundar, nema sami hópur sé að koma aftur í skólastofuna
• Mikilvægt er að loftræsta vel í skólastofum, s.s. með því að hafa glugga opna eins og hægt er
• Bókasafnið er opið en þar mega ekki koma saman fleiri en 30
• Mötuneytið verður opið og verður gert ráð fyrir þremur 30 manna hópum frá kl. 11:55-13:20
• Gryfjan verður opin
• Áfram verður verkferill í gildi vegna Covid 19 smits eða gruns um smit

Brautskráning haustannar fer fram frá Ísafjarðarkirkju á morgun, 18. desember, kl. 15:00.

Að þessu sinni brautskráum við 20 nemendur af sex brautum; 1 nemandi útskrifast af lista- og nýsköpunarbraut, 3 sjúkraliðar útskrifast og 17 nemendur útskrifast með stúdentspróf; 3 af félagsvísindabraut, 3 af náttúruvísindabraut, 9 af opinni stúdentsbraut og 2 með stúdentspróf af fagbraut.

Vegna gildandi sóttvarnareglna verða því miður engir gestir viðstaddir athöfnina.

Streymt verður frá athöfninni og hefst útsending kl. 14.50.

Streymið er hér.

Æfing útskriftarefna fyrir athöfnina fer fram í dag, fimmtudaginn 17. desember kl. 17:00.