Í dag, 7. desember, var síðasti kennsludagur haustannar og við taka námsmatsdagar til 15. desember. Misjafnt er í áföngum hvernig viðveru á námsmatsdögum er háttað með tilliti til verkefnaskila, hlutaprófa og fleira. Eru nemendur beðnir um að kynna sér fyrirkomulag námsmatsdaganna vel.

Opnað verður fyrir einkunnir í INNU föstudaginn 15. desember n.k. Kennarar hafa tíma til mánudagsins 18. desember kl. 16:00 að skila einkunnum. Eru nemendur beðnir um að sýna biðlund þangað til ef einkunnir eru ekki komnar inn í INNU þann 15. desember.

Skólastarf vorannar hefst fimmtudaginn 4. janúar 2018.

Á morgun og fimmtudag, 29.-30. nóvember fara fram Vísindadagar en það eru óhefðbundnir skóladagar með þátttöku nemenda. Á Vísindadögum sýna nemendur hver öðrum og gestum þekkingarnám sitt. Allir nemendur eru vísindamenn en þeir eru mislangt komnir í öguðum vinnubrögðum við að afla sér þekkingar og svara knýjandi spurningum, t.d. með því að raða saman þekkingu á hugvitsamlegan hátt. Mikilvægur þáttur í sköpun nýrrar þekkingar er að deila henni hvert með öðru. Þessir dagar eru fyrir nemendur og þá þekkingu sem þeir vilja setja saman til að gera okkur öll vísari.

Meira

Fimmtudaginn 23. nóvember verður lýðheilsudagur í Menntaskólanum á Ísafirði. Dagskráin hefst kl. 9 og lýkur kl. 13:00.   Í haust hafa 18 nemendur verið í lýðheilsuáfanga hjá Kolbrúnu Fjólu Arnarsdóttur íþróttakennara þar sem unnið hefur verið að öllu því sem viðkemur viðburði eins og þessum.

Meira

Vegna slæms veðurs og veðurspár fyrir daginn eru nemendur og forráðamenn hvattir til að fylgjast vel með veðurspá og fréttum af færð og veðri. Skólanum verður ekki lokað vegna veðurs nema eftir tilmæli frá lögreglu eða almannavörnum. Ef nemandi kemst ekki í skóla vegna ófærðar þarf hann eða forráðamaður að tilkynna það samdægurs á skrifstofu skólans í síma 450-4400.

Fljótlega fer af stað áfangi sem heitir STERKARI ÉG (HAME1HA01) í umsjón þeirra Auðar Ólafsdóttur og Hörpu Guðmundsdóttur. Í áfanganum kynnast þátttakendur leiðum til að takast á við vandamál og mótlæti sem getur haft truflandi áhrif í daglegu lífi. Áhersla er lögð á að skoða hvernig hugsanir, hegðun og líðan tengjast og hvernig þátttakendur geta nýtt sér þá tengingu til að efla sig í leik og starfi. Áhugasamir hafi samband við Stellu námsráðgjafa (stella@misa.is)

Í dag var haldinn hátíðlegur dagur íslenskrar tungu sem jafnframt er fæðingardagur Jónasar Hallgrímssonar. Af því tilefni voru nemendur með dagskrá á sal undir handleiðslu Emils Inga Emilssonar íslenskukennara. Dagskráin var sérstaklega tileinkuðu skáldunum Jóni Kalmann og fyrrum MÍ-ingnum Vilborgu Davíðsdóttur.

Innritun í nám á vorönn 2018 stendur yfir. Nemendur sem hyggja á nám í dagskóla sækja um í gegnum Menntagátt á slóðinni www.inna.is/framhaldsskolaumsokn. Nemendur sem vilja stunda fjarnám í MÍ á vorönn 2018 sækja um í gegnum heimasíðu skólans. Skráning fer fram hér.

Skráning í fjarnám á vorönn er hafin og stendur yfir til 5. janúar 2018. Hér má sjá hvaða áfangar eru í boði í fjarnámi. Skráning fer fram hér á síðunni. Allar frekari upplýsingar um fjarnámið gefur Andrea Harðardóttir áfangastjóri (andrea@misa.is)

Í fundartímanum í morgun bauð stjórn nemendafélagsins upp á afar áhugaverðan fyrirlestur Veigu Grétarsdóttur. Veiga sem er gamall MÍ-ingur fæddist í karlmannslíkama og í áratugi háði hún baráttu við sjálfa sig en ákvað loks að hefja kynleiðréttingarferli. Við þökkum Veigu fyrir fróðlegan fyrirlestur og greið svör við fjölda spurninga sem hún fékk frá nemendum og starfsfólki.

Við vekjum athygli á að Samtökin '78 bjóða upp á ráðgjöf fyrir alla þá sem eru að koma út sem trans, sem samkynhneigð/tvíkynhneigð/pankynhneigð/asexúal eða eru í óvissu um kynhneigð eða kynvitund. Lesa má nánar um þá ráðgjöf á heimasíðu samtakanna.

Við MÍ fer fram innra mat á skólastarfinu eins og kveðið er á um í aðalnámskrá  frá 2011 og reglugerð nr. 700 frá 2010 um mat og eftirlit í framhaldsskólum. Í 3. grein reglugerðarinnar segir m.a.:  

Hver framhaldsskóli skal með kerfisbundnum hætti meta árangur og gæði skólastarfsins. Virkt innra mat skal samofið annarri starfsemi skóla og skal skapa forsendur fyrir markvissu mati á árangri og leiðum að markmiðum skóla. Innra mat skal vera umbótamiðað og ná til allra helstu þátta skólastarfsins. Það skal stuðla að aukinni vitund um mikilvægi gæða í öllu starfi.

Tryggja skal virka þátttöku starfsmanna, foreldra, nemenda og skólaráðs í innra mati, eftir því sem við á. Innra mat skal byggja á fjölbreyttum gögnum sem taka mið af viðfangsefnum hverju sinni.

Framhaldsskólar skulu birta opinberlega og á aðgengilegan hátt, á heimasíðu sinni eða með öðrum hætti, upplýsingar um framkvæmd innra mats, helstu niðurstöður og umbótaáætlun. Einnig skal gera grein fyrir tengslum matsins við skólanámskrá og stefnu skólans.

Sjálfsmatsnefnd skólans sem sinnir innra mati hefur nú lokið skýrslu fyrir skólaárið 2016-2017. Skýrsluna má finna hér á heimasíðunni.