Í síðustu viku stóð yfir keppnin Hjólum í skólann á milli framhaldsskóla landsins. Skólum var skipt í þrjá flokka eftir fjölda nemenda og starfsmanna. Leikar fóru svo að Menntaskólinn á Ísafirði sigraði keppnina í sínum flokki sem var flokkur skóla með færri en 400 nemendur og starfsfólk. Nemendum og starfsfólki skólans er óskað til hamingju með sigurinn. Svo er um að gera að láta ekki fyrsta sætið úr greipum ganga á næsta ári. Nánar má lesa um keppnina og úrslitin á síðunni http://hjolumiskolann.is/

Nú er að hefjast þriðja árið sem MÍ er þátttakandi í átakinu Heilsueflandi framhaldsskóli. í tilefni af því að þetta skólaár verður helgað geðrækt mun embætti landlæknis standa fyrir málþingi um geðrækt í framhaldsskólum, föstudaginn 20 september. Verkefnisstjóri MÍ er Jónas L. Sigursteinsson íþróttakennari. Hann mun sækja málþingið fyrir okkar hönd en nánar má lesa um það á heimasíðu landlæknisembættisins. http://www.landlaeknir.is/um-embaettid/frettir/frett/item21051/Malthing-um-gedraekt-i-framhaldsskolum

Myndir úr nýnemaferð og busavígslu eru nú komnar inn á heimasíðuna. Í nýnemaferðinni var að vanda farið í Dýrafjörð. Gist var á Hótel Núpi og farið í gönguferðir, út á Arnarnes og í Skrúð. Nemendur sáu um kvöldvöku og stjórn NMÍ kom í heimsókn og kynnti félagsstarf vetrarins.

Sækir þú nám fjarri lögheimili og fjölskyldu?

Kynntu þér reglur um námsstyrki og leiðbeiningar um skráningu á www.lin.is
Hægt er að skrá umsókn á Innu eða netbankanum!

Umsóknarfrestur vegna skólaársins 2013-2014 er til 15. október næstkomandi!

Lánasjóður íslenskra námsmanna
Námsstyrkjanefnd

Nýnemaferð Menntaskólans á Ísafirði 29. – 30. ágúst 2013

Náms- og samskiptaferð að Núpi í Dýrafirði

 

Fimmtudagur:

• Mæting kl. 8:00.  Lagt af stað      eigi síðar en kl. 8:30
• Keyrt að Núpi
• Nemendur og kennarar koma sér fyrir á herbergjum
• Kl. 10:00 verður gönguferð
• Hádegisverður kl. 13:00
• Frjáls tími
• Kl. 14:30 verður leiðsögn um svæðið - Skrúður
• Kaffitími kl. 15:30
• Nemendum skipt í hópa til að undirbúa kvöldvöku en annars frjáls tími      fram að kvöldmat
• Kvöldmatur kl. 19:00
• Nemendur undirbúa kvöldvöku kl. 19:30-20:00
• Kvöldvaka kl. 20:00 en einn af hápunktum hennar eru magnaðar      draugasögur sem sagðar verða af fyrrverandi og núverandi staðarmönnum
• Fulltrúar NMÍ koma í heimsókn og kynna félagslífið
• Svefntími kl. 23:30

 

Föstudagur:

• Farið á fætur kl. 9:00
• Morgunverður kl. 9:00 – 9:45
• Ratleikur hefst kl. 10:00 - hópaskipti
• Gengið frá í herbergjum og farangur tekinn saman frá kl. 11:30 – 12:00
• Brottför frá Núpi kl. 12:00

 

ATH!  Dagskráin er birt með fyrirvara um breytingar þar sem að veður gæti sett strik í reikninginn.

 

NAUÐSYNLEG MINNISATRIÐI:

• Skólareglur gilda í ferðinni
• Skólinn greiðir rútuferðir
• Nemendur greiða fyrir gistingu og fæði
• Inni í fæði er hádegisverður, miðdegissnarl, kvöldverður og kvöldkaffi      á fimmtudag og morgunmatur á föstudag
• Nemendur taka með sér nesti fyrir fimmtudagsmorgun (ef þörf er á)
• Kostnaður er 6.700 kr.       Nemendur greiða með peningum í rútunni við brottför
• Nemendur eiga að hafa með sér kodda, svefnpoka/sæng og lak 
• Takið með ílát undir ber J
• Nemendur verða að vera vel klæddir og koma með hlý föt og viðeigandi      skófatnað

 

Eftirtaldir starfsmenn fara með í ferðina:

Emil Ingi Emilsson, Friðgerður Guðný Ómarsdóttir,

Jónas Leifur Sigursteinsson og Stella Hjaltadóttir GSM: 846-6206

Skrifstofa skólans er nú opin aftur eftir sumarleyfi. Námsráðgjafar koma til starfa þann 15. ágúst og skólinn verður settur þann 22. ágúst kl. 9. Nýnemar og nemendur yngri en 18 ára hitta umsjónarkennara að lokinni skólasetningu og fá stundatöflur afhentar. Að því búnu hefjast töflubreytingar. Kennsla hefst föstudaginn 23. ágúst.

Menntaskólinn á Ísafirði í samstarfi við Þjóðbúningafélag Vestfjarða mun bjóða nemendum skólans að sauma sér þjóðbúning í vali næsta vetur. Um er að ræða kvenbúninga, upphlut eða peysuföt frá 19. eða 20. öld. Kennt verður einu sinni í viku, allan veturinn í tvo til þrjá tíma í senn og ljúka nemendur við að sauma sér heilan búning á þeim tíma. Kennarar verða Anna Jakobína Hinriksdóttir og Soffía Þóra Einarsdóttir, en þær hafa kennt þjóðbúningasaum hjá Þjóðbúningafélagi Vestfjarða undanfarin misseri. ÞBFV hefur fengið styrk frá Menningaráði Vestfjarða, þannig að þátttakendur í þessu námskeiði munu ekki þurfa að greiða námskeiðsgjöld, einungis efniskostnað. Þetta er því einstakt tækifæri og hefur þjóðbúningasaumur aldrei verið kenndur við framhaldsskóla hér á landi fyrr svo vitað sé. Enn eru nokkur pláss laus í þessum áfanga og áhugasamir þurfa að setja sig í samband við Friðgerði Ómarsdóttur fridgerd@misa.is eða Hrafnhildi Hafberg hrafnh@misa.is til að fá nánari upplýsingar.

Laugardaginn 25. maí voru 67 nemendur brautskráðir frá Menntaskólanum á Ísafirði. Að vanda var útskriftarathöfnin haldin í Ísafjarðarkirkju að viðstöddu fjölmenni. Að þessu sinni voru átta nemendur útskrifaðir með diplóma í förðunarfræðum. Þeir nemendur hafa auk þess lokið þeim greinum í hársnyrtiiðn sem kenndar eru á tveggja ára grunnnámsbraut við skólann. Þá voru 12 nemendur útskrifaðir með A réttindi vélstjórnar. Einnig luku fjórir sjúkraliðar námi og fimm stálsmiðir. Af félagsfræða- og náttúrufræðibraut voru brautskráðir 36 nemendur og tveir luku viðbótarnámi til stúdentsprófs. Að vanda sáu útskriftarnemar um tónlistarflutning í athöfninni en einnig kom Sönghópur MÍ fram undir stjórn Bjarneyjar Ingibjargar Gunnlaugsdóttur og við undirleik Kristínar Hörpu Jónsdóttur nema á fyrsta ári. Þá fluttu fulltrúar 10, 20 og 25 ára stúdenta ávörp og einnig formaður skólanefndar, Jóna Benediktsdóttir. Við athöfnina voru fjölmargar viðurkenningar veittar fyrir góðan námsárangur. Hæstu meðaleinkunn á stúdentsprófi hlaut Sigmundur Ragnar Helgason en hann lauk prófi af náttúrufræðibraut með einkunnina 9,67. Er það hæsta einkunn sem gefin hefur verið við skólann. Næst hæstu einkunn hlaut Marelle Maekalle en hún lauk prófi af náttúrufræðibraut á þremur árum, með einkunnina 9,37.

Laugardaginn 25. maí verða 67 nemendur brautskráðir frá Menntaskólanum á Ísafirði. Brautskráning og skólaslit verða í Ísafjarðarkirkju og hefst athöfnin kl. 13. Á dagskrá verða tónlistaratriði og ávörp afmælisárganga auk brautskráningar og hefðbundinna skólaslita. Allir velunnarar skólans eru velkomnir á meðan húsrúm leyfir.

Nú stendur yfir lokainnritun nemenda sem eru að ljúka námi í 10. bekk grunnskóla. Innritunin fer fram í gegnum menntagatt.is og nemendur hafa fengið sendan veflykil frá námsmatsstofnun. Frestur til að sækja um eða breyta umsókn rennur út á miðnætti þann 10. júní n.k.