Þann 4. janúar síðastliðinn var nýsköpunarsmiðjan (Fab-Lab) sem staðsett er í húsnæði MÍ opnuð með viðhöfn. Smiðjunni var gefið nafnið Guðmundarsmiðja til heiðurs Guðmundi Þór Kristjánssyni vélstjórnarkennara við Menntaskólann á Ísafirði. Guðmundur var frumkvöðull að stofnun nýsköpunarsmiðju á Ísafirði, en hann lést árið 2010 langt fyrir aldur fram. Sonur Guðmundar heitins, Þórir Guðmundsson, afhjúpaði minningarskjöld um Guðmund ásamt Jóni Reyni skólameistara. Meira er hægt að lesa um opnun smiðjunnar á heimasíðu bb.is.

Nemendur yngri en 18 ára eru minntir á umsjónartímann í fundartímanum á fimmtudaginn.

Stafræna smiðjan sem nefnd er Fab-lab og staðsett er í Menntaskólanum á Ísafirðir er nú komin á góðan skrið. Smiðjan verður formlega opnuð í dag föstudaginn 4. janúar, klukkan 13. Dagskráin hefst með ávarpi Mennta- og menningarmálaráðherra á sal Menntaskólans og lýkur svo með formlegri opnun í smiðjunni sjálfri. Boðið verður upp á kaffiveitingar í mötuneyti skólans.  Allir velkomnir!

Vorönn 2013 hefst föstudaginn 4. janúar kl. 9 með ávarpi skólameistara á sal. Að því búnu hitta nemendur umsjónarkennara sína og fá afhentar stundatöflur og bókalista. Síðan taka við töflubreytingar fyrir þá nemendur sem þurfa á þeim að halda. Bókalistar eru nú þegar aðgengilegir í INNU fyrir þá nemendur sem greitt hafa þjónustugjöld vorannar. Stundatöflur verða opnaðar í fyrramálið.

Á önninni sem nú er senn liðin hefur verið tekið upp á þeirri nýjung að nemendur í áfanganum ENS503  bjóða meistaranámsnemum hjá Háskólasetri Vestfjarða í heimsókn til sín og kynna fyrir þeim Vestfirðina í máli og myndum. Kynningarnar fara fram á ensku og eru hluti af sjálfstæðu rannsóknarverkefni sem nemendurnir hafa unnið að undanfarið. Háskólanemarnir hafa einnig komið í heimsókn í skólann og sagt frá sínum verkefnum. Að sögn Kristjáns Viggóssonar kennara í ensku hefur verkefnið hagnýtt gildi, bæði fyrir nemendur MÍ sem æfast í tungumálinu og einnig fyrir meistaranemana sem þannig fá fræðslu um nærumhverfið. Verkefnið sé þannig nokkurskonar tilraun til að byggja brú milli samfélagsins og háskolasetursins og efla samskiptin á milli þessara skólastiga.
 

Próftafla haustannar er nú aðgengileg í INNU fyrir hvern og einn nemanda. Próftöfluna má einnig skoða hér í heild sinni.
Verkleg próf eru auglýst sérstaklega hjá hverjum kennara.

Umsóknarfrestur um nám í skólann á vorönn í gegnum Menntagátt er nú liðinn. Þeir sem hafa áhuga á að stunda nám við skólann á vorönn geta þó enn sent inn umsóknir hér í gegnum heimasíðuna. Smellið hér til að fylla út umsóknareyðublað.

Skólinn auglýsir eftir umsækjendum um námsstyrk úr sjóði Elínar Þorláksdóttur og Benediktss Bjarnasonar. Í ráði er að úthluta nú í vetur allt að fjórum styrkjum að upphæð kr. 75.000. Skriflegum umsóknum skal skila til skrifstofu skólans eða skólameistara eigi síðar en föstudaginn 30. nóvember 2012. Nánari upplýsingar um námsstyrkinn má sjá hér.

Í síðustu viku kom Ingvar Sigurgeirsson, fyrrum prófessor við HÍ í heimsókn í skólann og var með námskeið fyrir kennara skólans um námsmat. Menntaskólinn á Ísafirði hefur í tengslum við nýju framhaldsskólalögin lagt áherslu á að breyta kennsluháttum og námsmati og er á stefnuskrá skólans að taka upp leiðsagnarmat í sem flestum áföngum. Markmið með leiðsagnarmati er að nemendur fái leiðsögn um hvernig þeir geti bætt sig og þeir fái endurgjöf sem sýnir þeim hvar þeir eru staddir í náminu.

Eftir að hafa hlýtt á kennara segja frá tilraunum sínum til bættra kennsluhátta og breytts námsmats gaf Ingvar út þá yfirlýsingu að Menntaskólinn á Ísfirði teldist nú meðal þróunaskóla á framhaldsskólastigi um leiðsagnarmat. Eftir námskeiðið sem féll í góðan jarðveg hjá kennurum er stefnt að enn frekari á þróun þessara mála á næstu starfsdögum skólans.

Undankeppni MÍ fyrir söngkeppni framhaldsskólanna var haldin í gærkvöldi þrátt fyrir hríðarbyl og ófærð. Keppnin tókst í alla staði vel og umgerðin var að vanda glæsileg, en mikill undirbúningur liggur þar að baki. Fólk lét veður og færð þó ekki aftra sér og mæting var furðu góð. Kynnir kvöldsins var Arnar Guðmundsson fyrrum nemandi skólans en hann slapp vestur rétt áður en leiðin lokaðist vegna veðurs. Hljómsveit hússins skipuðu þau Benjamín Bent Árnason, Kristín Harpa Jónsdóttir, Mateusz Samson og Þormóður Eiríksson. Hljómsveitin lék undir í flestum atriðum en auk þess kom fjöldi annarra hljóðfæraleikara við sögu. Sigurvegari að þessu sinni var Magnús Traustason en hann flutti Hjálmalagið "Leiðin okkar allra". Með Magnúsi á sviðinu í bakröddum voru þeir Jóhann Gunnar Guðbjartsson, Finnbogi Dagur Sigurðsson, Birgir Knútur Birgisson og Davíð Sighvatsson. Þeir verða fulltrúar MÍ í lokakeppninni sem haldin verður í apríl á næsta ári. Gangi ykkur vel strákar!