Um páskana hélt María Rut Kristjánsdóttir nemandi skólans einkasýningu á verkum sínum í Edinborgarhúsinu. Sýningin var hluti af listahátíðinni List án landamæra og bar yfirskriftina Myndverk Maríu Rutar. María Rut hefur unnið með teikningu og tónlist þar sem hún teiknar við hinar ýmsu tegundir tónlistar og gestum sýningarinnar gafst tækifæri á að hlusta á þá tónlist sem María Rut hefur hlustað á meðan hún vinnur að verkunum. Verk Maríu Rutar verða til sýnis í skólanum í Gallerí Gangi frá og með mánudeginum 5. maí og til 16. maí.

Útskriftarnemar buðu kennurum og starfsfólki upp á veisluhlaðborð á kennarastofu eins og venja er síðasta kennsludag fyrir dimission. Borðið svignaði undan kræsingunum sem kennarar og nemendur gæddu sér á eins og meðfylgjandi myndir bera með sér. Kennarar og starfsmenn ávörpuðu nemenur, þökkuðu þeim samveruna síðustu 3-4 árin og óskuðu þeim velfarnaðar í framtíðinni. Myndir úr samsætinu er komnar inn á heimasíðuna.

Skólahald er nú hafið að nýju eftir páskafrí. Eins og samþykkt var fyrir páska og kynnt fyrir nemendum, þá bætast fimm kennsludagar við skóladagatal vorannar. Þetta er gert til þess að bæta nemendum upp þá kennslu sem þeir misstu af í verkfalli kennara. Þessir dagar eru 22. apríl, 25. apríl (sumardagurinn fyrsti) og 12.-14. maí. Því miður er staðan sú varðandi sumardaginn fyrsta að þá eru ekki í gangi almenningssamgöngur á vegum sveitarfélaganna á norðanverðum Vestfjörðum. Við vonum að þetta komi ekki að sök og að nemendur geti sameinast í bíla til að mæta í skólann þennan dag. 

Í dag er valdagur og nemendur eiga að velja sér áfanga fyrir haustönn. Allir hafa fengið leiðbeiningar sendar í tölvupósti um valið. Nemendur yngri en 18 ára hitta umsjónarkennara í fundartíma kl. 10.25 og fá aðstoð við valið. Eldri nemendur geta fengið aðstoð hjá námsráðgjöfum eða aðstoðarskólameistara.

Leiðbeiningar fyrir val í INNU

Verknámsáfangar í boði

Bóknámsáfangar í boði

Framvinda bóknáms

Skóladagatal vorannar 2014 hefur verið endurskoðað til að bæta nemendum upp kennsludaga sem féllu niður í verkfallinu í mars. Endurskoðað skóladagatal má sjá með því að smella hér. 
Þetta felur í sér að kennt verður þriðjudaginn 22. apríl, fimmtudaginn 24. apríl (sumardaginn fyrsta) og dagana 12. til 14. maí. Einnig bætist einn námsmatsdagur við þann 22. maí. Útskrfit verður laugardaginn 24. maí eins og gert hafði verið ráð fyrir.  Nánari upplýsingar um skipulag prófadaga (próftafla) verða birtar um leið og þær liggja fyrir.

Það er mikil vinna fyrir höndum hjá nemendum og kennurum næstu vikurnar og mikilvægt er að nemendur mæti vel í kennslustundir og sinni náminu af kappi það sem eftir lifir annar. 

Hringt verður á sal rétt fyrir kl. 10 í dag. Skólameistari hittir þá nemendur á fundi til að kynna þær breytingar sem gerðar hafa verið á skóladagatali það sem eftir er af vorönninni. Mikilvægt er að allir nemendur mæti á þennan fund.

Nýr kjarasamningur Félags framhaldsskólakennara og Félags stjórnenda í framhaldsskólum við ríkið var undirritaður í gær. Verkfalli kennara og stjórnenda hefur því verið frestað og skóli hefst samkvæmt stundaskrá mánudaginn 7. apríl.

Nú stendur yfir forinnritun nemenda í 10. bekk (fæddir 1998 eða síðar). Innritunin hófst mánudaginn 3. mars og lýkur föstudaginn 11. apríl. Nemendur hafa fengið bréf frá Námsmatsstofnun með veflykli að innritunarvef og leiðbeiningum afhent í grunnskólunum. Foreldrar/forráðamenn nemenda hafa fengið sent bréf í pósti frá Námsmatsstofnun með upplýsingum um innritunina. Nemendur í 10. bekk eru eindregið hvattir til að taka þátt í forinnrituninni. Lokainnritun nemenda í 10. bekk verður 5. maí til 10. júní

Nemendur í 10. bekk hafa frest til sækja um nám í framhaldsskóla eða breyta umsóknum úr forinnritun til miðnættis þriðjudaginn 10. júní. Einkunnir þeirra verða sendar rafrænt frá grunnskólum til framhaldsskóla eftir skólaslit.

Rafrænni innritun á starfsbrautir lauk 28. febrúar síðastliðinn. Tímamörk almennrar innritunar sem auglýstar eru á Menntagátt, gilda þó fyrir þær umsóknir sem berast síðar. Stefnt er að afgreiðslu allra umsókna á starfsbrautir fyrir lok apríl.

Innritun eldri nemenda (fæddir 1997 eða fyrr) sem ekki eru nú í framhaldsskóla eða ætla að skipta um skóla hefst föstudaginn 4. apríl og lýkur laugardaginn 31. maí. Umsækjendur sækja um Íslykil á www.island.is og nota hann til að sækja um á www.menntagatt.is.

Nánari upplýsingar um innritun í framhaldsskóla má fá á menntagatt.is og hjá Námsmatsstofnun í síma 550 2400.

Þessa dagana eru fjórir nemendur úr grunndeild málmiðngreina staddir í skólaheimsókn í Danmörku. Heimsóknin er styrkt af Leonardo starfsmenntaáætluninni sem er hluti af menntaáætlun ESB. Nemendurnir munu dvelja í bænum Fredericia á Jótlandi næstu þrjár vikurnar við nám og störf. MÍ hefur í nokkur ár verið í samstarfi við skólann EUC Lillebælt. Nemendahópar frá skólanum hafa komið hingað í heimsókn undanfarnar haustannir og nú fengu nemendur MÍ tækifæri til að endurgjalda heimsóknirnar. Eins og sjá má á meðfylgjandi mynd er vorið komið í Danmörku.

Nú er fertugustu Sólrisuhátíð MÍ lokið og hefðbundið skólastarf tekið við. Mikið var um að vera í skólanum alla vikuna og að vanda var kennslan brotin upp með gróskudögum frá miðvikudegi til föstudags. Þá daga gátu nemendur valið um allskyns smiðjur sem var stýrt af kennurum og einstaka nemendum. Fjölmiðlasmiðjan var í boði alla daga og nemendur í þeirri smiðju tóku ljósmyndir, settu saman fréttablað og tóku upp myndbönd af því sem var að gerast í skólanum þessa daga. Myndirnar má skoða hér á heimasíðu skólans og fréttablaðið má sjá með því að smella hér. Vinna við klippingu á myndefni sem tekið var upp stendur yfir en myndefnið mun verða birt hér á heimasíðunni þegar þeirri vinnu er lokið.