Í dag 6. janúar hófst kennsla í MÍ eftir jólaleyfi. Þau gleðilegu tímamót eru jafnframt að nú koma allir nemendur í skólann, bæði nemendur í verk- og starfsnámi og í bóknámi. Reglugerð frá 1. janúar um fjöldatakmarkanir í skólastarfi gerir þetta mögulegt, að því tilskyldu að grímur séu notaðar þar sem ekki næst að halda tveggja metra fjarlægð og hópastærðir fara ekki yfir 30 einstaklinga. 

Þessu fögnum við öll og starfsfólk MÍ býður nemendur hjartanlega velkomin aftur í skólann.

Fyrsta umferð Gettu betur 2021 hófst þann 4. janúar og í kvöld er komið að MÍ. Lið skólans mætir liði Menntaskólans á Laugarvatni kl. 19:00. Viðureignin er í beinni á ruv.is/null og allir eru hvattir til að fylgjast með.

Að þessu sinni er liðið skipað þeim Dagbjörtu Ósk Jóhannsdóttur, Davíð Hjaltasyni og Einari Geir Jónassyni. Strákarnir eru að keppa í 3. skipti en Dagbjört er nýliði. Í fyrra komst MÍ eftirminnilega í sjónvarpið í átta liða úrslit og er stefnan að sjálfsögðu sett þangað aftur. Þjálfari liðsins er, eins og undanfarin ár, Veturliði Snær Gylfason.

Áfram MÍ!

Þann 18. desember s.l. voru 20 nemendur brautskráðir við athöfn í Ísafjarðarkirkju. Vegna fjöldatakmarkana voru aðeins útskriftarnemar viðstaddir, ásamt tónlistarfólki og nokkrum úr hópi stjórnenda og starfsfólks, en streymt var frá athöfninni.

Að þessu sinni voru brautskráðir nemendur af 6 brautum. Einn nemandi lauk námi af lista- og nýsköpunarbraut, 3 sjúkraliðar útskrifuðust og 17 nemendur luku námi af stúdentsprófsbrautum. Þrír af félagsvísindabraut, þrír af náttúruvísindabraut, níu af opinni stúdentsbraut og tveir með stúdentspróf af fagbraut. Verðlaun fyrir góðan námsárangur hlaut Ingveldur Hera Magnúsdóttir sem útskrifaðist sem sjúkraliði og stúdent af fagbraut. Glóð Jónsdóttir hlaut viðurkenningu fyrir einstaka þrautseigju og seiglu í námi.

Við upphaf athafnarinnar lék Oliver Rähni nemandi skólans á 2. ári etýðu Op. 8, No. 11 eftir Alexander Scriabin á píanó. Síðan stýrðu Hildur Halldórsdóttir aðstoðarskólameistari og Heiðrún Tryggvadóttir áfangastjóri brautskráningu og afhendingu verðlauna. Þá fluttu nýstúdentarnir Andri Fannar Sóleyjarson og Magni Jóhannes Þrastarson lagið My way og Pétur Ernir Svavarsson lék með þeim á píanó. Að lokum ávarpaði Jón Reynir Sigurvinsson skólameistari nýstúdenta og sjúkraliða og óskaði þeim heilla í framtíðinni.

Nú um áramótin tók gildi ný reglugerð um takmörkun á skólastarfi vegna farsóttar Reglugerðin felur í sér ánægjulegar breytingar en skv. henni er skólastarf á framhaldsskólastigi heimilt að uppfylltum ákveðnum skilyrðum um sóttvarnir. Ljóst er að reglugerðin mun falla úr gildi ef smitum fjölgar í samfélaginu. Óvissan við upphaf vorannar er því mikil. Það mun því reyna á okkur öll eins og áður að láta skólastarfið ganga - með hvaða hætti sem það verður. Saman munum við geta þetta!

Veigamesta atriðið í reglugerðinni fyrir okkur í MÍ er að blöndun milli hópa er leyfileg sem þýðir að við getum haldið af stað inn í vorönnina með kennslu í skólahúsnæðinu skv. stundatöflu.

Áfram munu ýmsar reglur gilda um smit- og sóttvarnir sem kynntar verða betur þegar skólinn hefst en allir nemendur þurfa að búa sig undir að nota grímur í skólanum því fyrst um sinn a.m.k. verður grímuskylda. Grímur er að finna við alla innganga í skólann.

Ákveðið hefur verið að þriðjudaginn 5. janúar verði ekki kennd hraðstundatafla eins og til stóð. Kennsla mun hefjast skv. stundatöflu miðvikudaginn 6. janúar. Kennsla á afreksíþróttasviði hefst 11. janúar.

Stundatafla og töflubreytingar:

Opnað verður fyrir stundatöflur í INNU mánudaginn 4. janúar. Þar má einnig sjá bókalista. Þennan dag verða rafrænar töflubreytingar í boði (nánar kynnt síðar). Töflubreytingar hjá áfangastjóra og náms- og starfsráðgjafa verða í boði þriðjudaginn 5. janúar frá kl. 13:00. Hægt er að panta tíma hér eða hjá ritara skólans. Til að forðast hópamyndun þarf að panta tíma!

Mötuneyti opið:

Frá og með miðvikudeginum 6. janúar verður mötuneytið opið. 30 manns mega vera í mötuneytinu í einu og til að koma sem flestum að verður opnunartímanum því skipt í þrennt:

1. hópur 11:55-12:15, síðan tekur við sóttvarnarhlé
2. hópur 12:25-12:50, síðan tekur við sóttvarnarhlé
3. hópur 13:00-13:20

Skólastarfið í skólahúsnæðinu:

• Áhersla er á einstaklingsbundnar sóttvarnir
• 2 metra reglan er í gildi en þar sem henni verður ekki viðkomið þarf að nota grímur. Þar sem viðbúið er að 2 metra reglan verði víða erfið í framkvæmd er grímuskylda í öllu skólahúsnæðinu. Grímur er að finna við alla innganga í skólann.
• Þegar komið er inn í skólahúsnæðið er mikilvægt að allir spritti sig Sótthreinsa þarf skólastofur í lok hverrar kennslustundar, nema sami hópur sé að koma aftur í skólastofuna
• Mikilvægt er að loftræsta vel í skólastofum, s.s. með því að hafa glugga opna eins og hægt er
• Bókasafnið er opið en þar mega ekki koma saman fleiri en 30
• Mötuneytið verður opið og verður gert ráð fyrir þremur 30 manna hópum frá kl. 11:55-13:20
• Gryfjan verður opin
• Áfram verður verkferill í gildi vegna Covid 19 smits eða gruns um smit

Brautskráning haustannar fer fram frá Ísafjarðarkirkju á morgun, 18. desember, kl. 15:00.

Að þessu sinni brautskráum við 20 nemendur af sex brautum; 1 nemandi útskrifast af lista- og nýsköpunarbraut, 3 sjúkraliðar útskrifast og 17 nemendur útskrifast með stúdentspróf; 3 af félagsvísindabraut, 3 af náttúruvísindabraut, 9 af opinni stúdentsbraut og 2 með stúdentspróf af fagbraut.

Vegna gildandi sóttvarnareglna verða því miður engir gestir viðstaddir athöfnina.

Streymt verður frá athöfninni og hefst útsending kl. 14.50.

Streymið er hér.

Æfing útskriftarefna fyrir athöfnina fer fram í dag, fimmtudaginn 17. desember kl. 17:00. 

Búið er að draga í fyrstu umferð Gettu betur sem hefst eftir áramót. 

Menntaskólinn á Ísafirði mun mæta Menntaskólanum á Laugarvatni í fyrstu umferð sem fram fer miðvikudaginn 6. janúar. 

Lið Menntaskólans á Ísafirði er í ár skipað þeim Einari Geir Jónassyni, Davíð Hjaltasyni og Dagbjörtu Ósk Jóhannsdóttur.

Þjálfari liðsins eins og í fyrra er Veturliði Snær Gylfason. Liðið hefur stundað æfingar á haustönn. 

Liðið náði frábærum árangri í fyrra og komst í 8 liða úrslit og þar með í sjónvarpshluta keppninnar.

Við óskum Gettu betur liði MÍ góðs gengis í fyrstu umferð. 

Kæru nemendur,

þá fer þessari undarlegu önn alveg að ljúka. Nú eru bara tveir kennsludagar eftir af önninni og þá taka við sex námsmatsdagar.

Þið hafið staðið ykkur ótrúlega vel að halda þetta út. Við gerum okkur grein fyrir að mörgum hefur reynst þetta erfitt og þetta hafa verið krefjandi aðstæður fyrir alla. Tilkoma bóluefnis gefur okkur tilefni til bjartsýni og vonandi getum við öll mætt í skólann í upphafi vorannar.

Hér fyrir neðan fylgja upplýsingar um síðustu kennslu- og námsmatsdaga, útskrift og upphaf vorannar.

Gangi ykkur öllum vel á lokasprettinum.

Smellið hér til að sjá fréttabréfið sem sent var til allra nemenda. 

NÝNEMAR Í BÓKNÁMI:

Síðustu vinnustofur nýnema verða þriðjudaginn 8. desember og verða þær með sama fyrirkomulagi og undanfarnar tvær vikur.

NEMENDUR Í BÓKNÁMI:

Bóknám verður í fjarkennslu á Teams en kennarar hafa látið nemendur vita ef einhverjir tímar verða í skólahúsnæðinu mánudag og/eða þriðjudag. 

NEMENDUR Í VERKNÁMI:

Verknámskennsla verður áfram samkvæmt stundatöflu í skólahúsnæðinu.

NEMENDUR Á STARFSBRAUT:

Starfsbrautarkennsla verður áfram samkvæmt stundatöflu í skólahúsnæðinu.

Kæru nemendur,

nú er bara ein og hálf kennsluvika eftir af önninni og þá taka við sex námsmatsdagar. 

Fyrirkomulag skólastarfsins sem kynnt var í síðustu viku gildir til annarloka:

Vinnustofur nýnema í bóknámi og NÁSS verða á þriðjudag og fimmtudag í skólanum. 

NEMENDUR Í BÓKNÁMI: Bóknám verður áfram í fjarkennslu á Teams en kennarar láta nemendur vita með fyrirvara ef einhverjar kennslustundir verða í skólahúsnæðinu.

NEMENDUR Í VERKNÁMI: Verknámskennsla verður áfram samkvæmt stundatöflu í skólahúsnæðinu.

NEMENDUR Á STARFSBRAUT: Starfsbrautarkennsla verður áfram samkvæmt stundatöflu í skólahúsnæðinu.

Bókasafnið í skólanum verður opið út önnina. Geta nemendur nýtt sér þjónustu safnsins í samráði við safnvörð sem verður á staðnum. Fjöldatakmarkanir og reglur um sóttvarnir gilda á bókasafninu eins og í skólanum og er mikilvægt að allir fylgi þeim.

Nemendaþjónusta við nemendur er með sama sniði og verið hefur. Nemendur geta bókað tíma hjá náms- og starfsráðgjafa eða áfangastjóra HÉR. Við hvetjum nemendur til að leita til námsráðgjafa með allt sem snýr að náminu.

SÓTTVARNIR: Allir þurfa að huga að sínum persónubundnu sóttvörnum. Nauðsynlegt er að spritta sig við komuna inn í skólahúsnæðið og grímuskylda er þegar ekki er hægt að tryggja 2 m fjarlægðarmörk.

Gangi ykkur öllum áfram vel

og endilega hafið samband við skólann ef það eru einhverjar spurningar.

Þessi skrítna önn er alveg að verða búin! 

Landskeppni framhaldsskólanna í líffræði var haldinn fyrir skemmstu. 

Nokkrir nemendur MÍ tóku þátt og er þetta í fjórða sinn sem nemendur MÍ taka þátt í keppninni. 

Prófið er samið samkvæmt áherslum ólympíuleikanna í líffræði og byggir á alþjóðlegu námsefni fyrir framhaldsskóla. Keppnin fer fram samtímis um land allt. 

Ragnheiður Fossdal er líffræðikennari Menntaskólans á Ísafirði og hefur hún haldið utan um undirbúning og þátttöku nemenda MÍ í keppninni. 

Af þeim nemendum MÍ sem tóku þátt í ár stóð Karólína Mist Stefánsdóttir sig best og hlaut hún að launum glænýja útgáfu af líffræðibókinni Biology - a global approach eftir Campbell o.fl. 

Hildur Halldórsdóttir aðstoðarskólameistari afhenti Karólínu Mist bókina.