Vorpróf hefjast við skólann mánudaginn 3. maí. Prófin hefjast kl. 09:00 og nemendur eru minntir á að mæta stundvíslega og með þau gögn sem leyfilegt er að nota í prófinu. Nemendur eru hvattir til að kynna sér vel reglur um próf og próftökurétt sem hér fara á eftir.
 

REGLUR UM PRÓFTÖKU

1. grein

Ef nemandi er veikur í prófi skal hann tilkynna það til ritara áður en klukkustund er liðin af prófinu. Veikindin ber að staðfesta um leið og nemandi kemst til fullrar heilsu með því að útfylla þar til gert eyðublað sem fæst hjá ritara. Nemandi sem ekki skilar inn þessu eyðublaði hefur þar með fyrirgert rétti sínum til sjúkraprófs. Hafi nemandi sótt 95% kennslustunda á önn og fengið einkunnina 8,5 eða meira í námseinkun getur kennari farið þá leið í námsmati að nemandinn eigi þess kost að þreyta ekki lokapróf en sé það þó heimilt. Þetta gildir þó ekki um loka áfanga til stúdentsprófs.

2. grein

Nemendum ber að sitja hið minnsta eina klukkustund við verkefni sitt í hverju annarprófi. Komi nemandi meira en einni klukkustund of seint til prófs, hefur hann glatað rétti sínum til að þreyta prófið.

3. grein

Nemanda, sem fellur í einum áfanga eða fleirum, er heimilt að endurtaka próf í 6 námseiningum, séu einkunnir í þeim 3 eða hærri. Þetta ákvæði gildir þó ekki um íþróttaáfanga (ÍÞR).

4. grein

Nemandi sem verður uppvís að því að hafa rangt við í prófi telst fallinn á prófinu. Sé brotið alvaralegt á hann á hættu brottvikningu úr skóla, tímabundið eða til frambúðar, eftir alvarleika brots. Hið sama gildir um misferli þar sem námsmat felst í öðru en skriflegu prófi

Þann 26. mars sl. var söngkeppni starfsbrautanna haldin í Framhaldsskóla Vesturlands á Akranesi. Krakkarnir á starfsbraut MÍ skelltu sér á keppnina og fóru líka til Reykjavíkur áður en haldið var heim aftur. Þau voru sammála um að þetta hefði verið mjög skemmtileg ferð og hér er ferðasagan þeirra. Myndir úr ferðinni eru komnar inn á heimasíðunua. Á næsta ári verður haldin stuttmyndakeppni og hver veit nema krakkarnir okkar taki þátt í henni.

Dagana 17. - 19. mars sl. tóku nemendur í málm- og húsasmíði þátt í Íslandsmóti iðnnema í Reykjavík. Einnig var farið í heimsókn í skóla og fyrirtæki á höfuðborgarsvæðinu. Alls fóru 15 nemendur í ferðina ásamt kennurum sínum þeim Tryggva Sigtryggssyni og Þresti Jóhannessyni. Þeir Andri Guðnýjarson og Bjarni Kristinn Guðjónsson  kepptu í húsasmíði og Daníel Snær Bergsson, Óskar Þórisson og Ólafur Njáll Jakobsson kepptu í suðu. Myndir og ítarlegri frásögn af ferðinni er að finna hér.

Í fundartíma fimmtudaginn 15. apríl verður kynning á sal á hvatningarátaki til heilsueflingar sem íþróttasvið skólans stendur fyrir í samvinnu við ýmsa aðila utan skólans. Tilgangurinn er að fræða og hvetja nemendur og almenning til að kynna sér þær leiðir sem helst eru í boði á vegum þeirra félaga og samtaka sem þátt taka í kynningunni. Eftirtaldir aðilar taka þátt í kynningunni: Ferðafélag Íslands/Ferðafélag Ísfirðinga, Heilsuefling í Ísafjarðarbæ, Íþrótta- og Ólympíusamband Íslands - Almenningsíþróttasvið, Lýðheilsustöð, hreyfing, holt fæði, geðhjálp o.fl Ungmennafélag Íslands - Ganga.is - Fjölskyldan á fjallið.    

Lokafrestur til að velja áfanga fyrir haustönn 2010 er til kl. 16:00 þriðjudaginn 13. apríl. Þeir nemendur sem ekki velja sér áfanga fyrir þann tíma eiga ekki vísa skólavist næsta haust. Umsjónarkennarar leiðbeina við valið en ef frekari aðstoðar er þörf skal leita til námsráðgjafa eða áfangastjóra.

Á dögunum unnu nemendur verkefni í ENS 403 þar sem þau áttu að gera fréttabréf um það sem helst væri á döfinni í þeirra heimabyggð. Hér má sjá blaðið sem fjallaði um Súðavík og hér er blaðið sem fjallaði um Ísafjörð. Eins og sjá má  eru þetta skemmtileg og vel unnin verkefni.

Skólablað MÍ 2010 er komið út. Það gengur að þessu sinni undir nafninu SMÁÍS og er hið glæsilegasta. Hægt er að nálgast blaðið með því að smella hér

Sólrisuhátíðin sem sett var sl. föstudag er nú í fullum gangi. Nú þegar hefur Túskildingsóperan verið sýnd þrisvar en 4. sýning er þriðjudaginn 2. mars kl. 20:00. Margir viðburðir eru á dagskrá næstu daga og eru þeim gerð góð skil á síðunni solrisa.is. Í dag verður t.d. trommusólókeppni í löngu frímínútunum og svo kemur Þorsteinn Guðmundsson og sprellar á sal í kl. 12.30 á hádegi. Í kvöld verður svo uppistand í MÍ en þá kemur fram uppistandshópurinn Mið Ísland. Miðaverð á þann atburð er 700 krónur fyrir félaga í NMÍ en 1000 krónur fyrir aðra. Á morgun þriðjudag verður mjólkurdrykkjukeppni í löngu frímínútunum og í hádeginu kemur Bubbi Morthens fram á sal skólans. Áfram verður fjallað um viðburði vikunnar hér á síðunni bæði í fréttum og á atburðardagatali en einnig er áhugasömum bent á að skoða vefinn solrisa.is

Sólrisuleikritið Túskildingsóperan eftir Bertolt Brecht, í leikstjórn Hrafnhildar Hafberg, var frumsýnt í Edinborgarhúsinu í kvöld. Frumsýningargestir gerðu góðan róm að frammistöðu leikenda og annarra aðstandenda sýningarinnar í sýningarlok. Næstu sýningar á verkinu eru sem hér segir: Laugardaginn 27. febrúar, sunnudaginn 28. febrúar, þriðjudaginn 2. mars og fimmtudaginn 4. mars. Allar hefjast sýningarnar kl. 20:00 og er hægt að panta miða í síma 450-5565.

Hin árlega Sólrisuhátíð skólans verður sett föstudaginn 26. febrúar og stendur í rúma viku. Að vanda hefst setningarathöfnin á skrúðgöngu frá skólanum kl. 12 á hádegi. Gengið verður að Edinborgarhúsi þar sem boðið verður upp á létta hressingu. Sama dag verður innanhúsmót MÍ í fótbolta í íþróttahúsinu á Torfnesi og um kvöldið frumsýnir Leikfélag NMÍ Túskildingsóperuna í Edinborgarhúsinu. Fjölmargir viðburðir verða í boði alla vikuna og áhugasömum er bent á að kynna sér ítarlega dagskrá á solrisa.is en auk þess verða viðburðir kynntir hér á heimasíðu skólans.