Stundatöflur þeirra nemenda sem greitt hafa innritunar- og þjónustugjöld eru nú opnar í INNU. Nýnemar fá notenda- og lykilorð að lokinni skólasetningu.

Menntaskólanum á Ísafirði var slitið í 41. sinn við hátíðlega athöfn í Ísafjarðarkirkju laugardaginn 28. maí sl. Að þessu sinni voru 57 nemendur brautskráðir frá skólanum. Tveir nemendur luku námi í förðunarfræði, og átta luku A-námi vélstjórnar. Þrír nemendur luku B-námi vélstjórnar, tveir stálsmiðir voru brautskráðir og þrír vélvirkjar. Einnig luku tveir sjúkraliðar námi og einn iðnmeistari í rafvirkjun var brautskráður. Einn nemandi brautskráðist af starfsbraut og 33 nemendur luku stúdentsprófi. Hefur skólinn þar með brautskráð 65 nemendur á því skólaári sem er að ljúka, þar eð 8 nemendur voru brautskráðir um síðustu jól. Hæstu meðaleinkunn á stúdentsprófi 9,39 hlaut Sólveig Guðmunda Guðmundsdóttir stúdent af náttúrfræðibraut. Katrín Sif Kristbjörnsdóttir stúdent af náttúrufræðibraut hlaut meðaleinkunnina 9,37.  Fjölmörg verðlaun voru veitt nemendum við athöfnina fyrir góðan árangur og ástundun í námi. Við athöfnina söng kór MÍ undir stjórn Bjarneyjar Ingibjargar Guðmundsdóttur nokkur lög og Bára Jónsdóttir nýstúdent lék einleik á píanó. Einnig fluttu fulltrúar afmælisárganga ávörp og færðu skólanum gjafir.

            Útskriftarveisla var í íþróttahúsinu um kvöldið og voru þar um 230 gestir. Kór MÍ flutti þar mjög skemmtilegan söngleik og útskriftarnemar voru með skemmtiatriði ásamt afmælisárgöngum. Halldór Smárason lék á píanó undir borðhaldi eins og hann hefur gert frá 15 ára aldri en hann spilaði svo einnig með hljómsveitinni Húsinu á sléttunni í fjörugum og samfelldum dansleik sem stóð til kl.02.00.

 

Nemendur á Starfsbraut MÍ urðu í öðru sæti í Stuttmyndakeppni starfsbrauta í framhaldsskólum sem haldin var í Borgarholtsskóla 14. apríl. Þetta var í fyrsta skiptið sem þeir taka þátt í slíkri keppni. Í umsögn dómnefndar, sem skipuð var þremur leikstjórum, segir m.a. að myndin hafi verið frumleg og fyndin og að leikarar hafi sýnt mikil tilþrif.  Kristján Viggósson, enskukennari við Menntaskólann, sá um að velja efni myndarinnar í samráði við nemendur og leikstjórn var einnig í höndum hans. Hreinn Þórir Jónsson og Einar Bragi Guðmundsson, sem báðir eru nemendur í skólanum, tóku upp myndina og klipptu hana til sýningar. Það voru alls 16 skólar sem tóku þátt í keppninni. Í fyrsta sæti var framlag Fjölbrautaskólans í Garðabæ og í þriðja sæti varð Verkmenntaskólinn á Akureyri. Nemendum á starfsbraut er óskað innilega til hamingju með þennan frábæra árangur! Myndir úr ferðinni eru komnar inn á heimasíðuna.

Nokkur laus störf eru í boði við skólann. Nánari upplýsingar er að finna þegar smellt er á hnappinn laus störf hér til hægri á síðunni.

Lokað hefur verið fyrir val nemenda á haustönn 2011. Þeir nemendur sem enn eiga eftir að velja sér áfanga þurfa að hafa samband við námsráðgjafa.

Í fundartíma á morgun, fimmtudag eiga nemendur að mæta til umsjónarkennara sinna og velja áfanga fyrir næstu önn. Nemendur velja áfanga í INNU og fá aðstoð umsjónarkennara ef þörf krefur. Mikilvægt er að allir nemendur sem ætla að stunda nám við skólann á haustönn 2011 velji áfanga.

Smellið á hlekkinn hér fyrir neðan til að sjá áfanga í boði í bóknámi, sjúkraliðagreinum og íþróttum:
Áfangar í bóknámi, sjúkraliðanámi og íþróttum

Smellið á hlekkinn hér fyrir neðan til að sjá áfanga í boði á starfsbraut og í verknám:
Áfangar á starfsbraut og í verknámi

Smellið á hlekkinn hér fyrir neðan til að sjá leiðbeiningar fyrir val nema á 1. og 2. ári í bóknámi:
Leiðbeiningar

Nú er lokið Gróskudögum í MÍ, óhefðbundnum kennsludögum í Sólrisuvikunni. Framkvæmd Gróskudaga tókst mjög vel, enda lögðust allir á eitt, nemendur, kennarar og starfsfók skólans auk sjálfboðaliða í bænum, kærar þakkir!! Við erum reynslunni ríkari og höfum enn meiri grósku á næsta ári.

 Á meðfylgjandi mynd Halldórs Sveinbjörnssonar, sem fengin var af bb.is má sjá nemendur í sjósundi sem var ein af smiðjunum sem voru í gangi. Fleiri myndir munu birtast hér á síðunni innan tíðar.

Smelltu hér til að skoða dagskrá Sólrisuhátíðar.

Föstudaginn 25. febrúar var söngkeppni MÍ haldi í Íþróttahúsinu á Torfnesi. Fjölmörg atriði kepptu um hylli dómnefndar og um það hvert þeirra yrði fyrir valinu sem fulltrúi MÍ á söngkeppni framhaldsskólanna á Akureyri í apríl. Niðurstaðan varð sú að Hermann Óskar Hermannsson varð í fyrsta sæti með lagið Situatation eftir Bigga Bix. Í öðru sæti varð Agnes Ósk Marzellíusardóttir en sönghópur skipaður þeim Ásgeiri Guðmundi Gíslasyni, Freysteini Nonna Mánasyni, Magnúsi Traustasyni, Ómari Hólm og Valtý Þórarinssyni varð í 3. sæti. Húsbandið lék undir í flestum lögum og stóð sig frábærlega en það skipuðu Andri Pétur Þrastarsson á gítar, Aron Elmar Karlsson á bassa, Freysteinn Nonni Mánason á trommur og Sunna Karen Einarsdóttir á hljómborð. Eins og sjá má á meðfylgjandi myndum var umgjörð keppninnar hin glæsilegasta og má þakka það framkvæmdastjóra keppninnar Hermanni Siegle Hermannssyni og aðstoðarmönnum hans.Myndirnar tók Stephen Albert Björnsson og einnig myndirnar sem sjá má á myndasíðunni hér til vinstri á síðunni.

Hið árlega miðannarmat verður birt á INNU fimmtudaginn 17. febrúar. Umsjónartími vegna miðannarmats verður í fundartíma fimmtudaginn 24. febrúar.