Innritun í framhaldsskóla fer fram dagana 14. maí til og með 11. júní 2008. Innritunin er rafræn á Menntagátt. Nemendur 10. bekkjar fá sendar leiðbeiningar um innritun og veflykil að innskráningunni, sem fer fram á menntagatt.is/innritun Innritunin hófst eins og fyrr segir 14. maí. Eldri nemendur geta einnig sótt um skólavist á þennan hátt en verða þá fyrst að sækja um veflykil á Menntagátt.

Íslandsmót iðgreina fór fram 18-19 apríl sl. Í málmsuðu kepptu sex keppendur og af þeim voru þrír nemendur í MÍ, þeir Hafþór Ingi Haraldsson, Óskar Ágúst Albertsson og Yngvi Snorrason. Keppt var í þremur mismunandi suðuaðferðum Tig-suðu, Mag- og pinnasuðu. Þeir stóðu sig með ágætum og voru skólanum til mikils sóma þótt ekki tækist að sigra að þessu sinni. Myndir frá keppninni eru komnar á myndasíðuna.

Útskriftarefni skólans tóku daginn snemma s.l. föstudag og máluðu bæinn rauðan. Árbítur var grillaður við skólann milli kl. 4 og 5 og svo voru kennarar og starfsmenn vaktir hver af öðrum uns komið var heim til skólameistara þar sem nemendum var boðið upp á staðgóðan morgunverð. Eftir hefðbundna kveðjustund við skólann voru nemendur fluttir á gámabíl um bæinn. Myndir eru komnar inn á myndasíðuna.

 

Nemendur MÍ fjölmenntu til Akureyrar um helgina til að fylgjast með Söngkeppninni og styðja við bakið á Helgu Margréti sem tók þátt fyrir hönd skólans. Helga Margrét og bakraddirnar stóðu sig mjög vel en alls tóku 32 skólar þátt í keppninni og stóð flytjandi Verslunarskólans uppi sem sigurvegari í lok kvöldsins. Það fór þó ekkert á milli mála að MÍ var með öflugasta stuðningsliðið í salnum sem var skrautlegt og lét vel í sér heyra. Ferðin norður tókst vel og allir skemmtu sér hið besta. Myndir frá keppninni er að finna á myndasíðunni.

Miðvikudaginn 9. apríl s.l. var sameiginlegur forvarnardagur SÍF í skólanum. Af því tilefni var nemendum boðið upp á hollustu í löngu frímínútunum. Gamla bakaríið og Samkaup buðu upp á veitingarnar.

Í dag heimsóttu skólann góðir gestir í tilefni Sólrisu. Félagar úr "Ungkokkar Íslands" mættu á svæðið og töfruðu fram gómsætar kræsingar fyrir nemendur og starfsfólk skólans. Áhugasömum gafst þar kostur á margrétta veisluhlaðborði fyrir aðeins 500 krónur. Augljóslega vildu margir nýta sér þetta hagstæða boð því fyrir skömmu fyrir hádegi hafði myndast löng biðröð framan við innganginn inn í mötuneytið. Myndir eru komnar inn á myndasíðuna.

Í gær fór fram háskólakynning hér í skólanum þar sem fulltrúar frá 8 háskólum kynntu námsframboð skóla sinna fyrir menntskælingum. Yfir 500 námsleiðir sem háskólarnir bjóða upp á voru kynntar. Þess má geta að tveir af fyrrum nemendum MÍ mættu á kynninguna fyrir hönd sinna skóla, þau Aðalbjörg Sigurjónsdóttir frá HR og Leifur Skarphéðinsson frá HÍ.

Einn af viðburðum Sólrisuvikunnar var trommusólókeppni sem haldin var á Sal skólans í morgun. Margir trommusnillingar komu þar fram og lömdu húðirnar. Til þess að dæma í keppninni voru fengnir Önfirðingarnir og frændurnir Önundur Hafsteinn Pálsson og Barði Önundarson. Mikil tilþrif heyrðust og sáust á sviðinu og tóku dómarar m.a. tillit til svipbrigða og "tungutaks" auk leikni með kjuðana. Það var Björn Hjálmarsson sem sigraði keppnina en í öðru og þriðja sæti höfnuðu Önfirðingarnir og frændurnir Brynjólfur Óli Árnason og Jóhann Ingi Þorsteinsson. Myndir frá keppninni eru inni á myndasíðunni.

Nemendur MÍ fengu góða gesti í heimsókn fyrir skemmstu. Þar voru á ferðinni Tómas Árni Jónasson fyrrum nemandi skólans og Jón Þór Gunnarsson félagi hans úr Verkfræðideild HÍ. Þeir voru að kynna námi við deildina fyrir nemendum MÍ og mætti fjöldi áhugasamra nemenda á kynninguna.

Hin árlega Sólrisuhátíð Menntaskólans á Ísafirði hefst 29. febrúar kl 12:15 með skrúðgöngu frá skólanum að Kaffi Edinborg. Um svipað leiti fer útvarp Mí-flugan í loftið á tíðninni FM 101.0. Dagskrá hátiðarinnar er að vanda mjög vegleg. Meðal þess sem í boði verður er myndlistarsýning Davíðs Arnar Halldórssonar í Slunkaríki, Rokksúpa í Edinborgarhúsi, bíósýningar, trommusólókeppni, uppistand, fyrirlestrar, háskólakynningar, styrktartónleikar, alheimsmeistaramót í víkingaskák og sundlaugapartí. Að ógleymdu sólrisuleikritinu Rocky Horror Picture Show. Ítarlega dagskrá hátíðarinnar er að finna á vefsíðunni solrisa.is